Կառավարությունը մերժեց ՕԵԿ-ին

ՕԵԿ մամուլի խոսնակ Արթուր Միսակյանը ֆեյսբուքյան իր էջում գրել է.

«Մերժելն ու փոխարենը ոչինչ չձեռնարկելն առնվազն անընդունելի է

Հաշվի առնելով միջազգային փորձը, ինչպես նաև ելնելով Հայաստանում բանիմաց երիտասարդների՝ բարձրագույն կրթություն ստանալու հնարավորության ապահովման անհրաժեշտությունից, ՕԵԿ-ը Ազգային ժողովի թե նախորդ, և թե այս գումարումում շրջանառության մեջ է դրել «Պետական օժանդակության ուսումնական վարկերի մասին» ՀՀ օրենքի նախագիծը, համաձայն որի նախատեսվում է պետական օժանդակությամբ ուսումնական վարկեր տրամադրել բարձրագույն և միջին մասնագիտական ուսումնական հաստատություններում սովորողներին, ընդ որում' ուսումնական վարկը տրամադրել ինչպես անմիջապես ուսման վարձը վճարելու, այնպես էլ' հարակից ծախսերի (սնվելու, բնակվելու, տրանսպորտի, հագուստի, ուսումնական նյութերի ձեռք բերման և այլն) նպատակով:

Եվ, ինչպես սպասելի էր, երեկ Կառավարությունը մերժեց ՕԵԿ անդամ պատգամավորներ Հեղինե Բիշարյանի և Հովհաննես Մարգարյանի՝ օրենսդրական նախաձեռնության կարգով ներկայացրած այդ նախագծերի փաթեթը:

Թե ինչու այս և մնացած կարևոր օրենքները մերժվում են, հասկանալի է, սակայն մեկ բան հստակ է՝ օրենքի ընդունմամբ ի վերջո Հայաստանում կներդրվեր ուսումնական վարկավորման այնպիսի համակարգ, որը պահանջարկ կունենա ուսանողների մոտ, այսինքն' պետության օժանդակությամբ կներդրվի երկարաժամկետ, ցածր տոկոսադրույքներով ուսումնական վարկավորման համակարգ, որը հասու կլինի յուրաքանչյուր սոցիալապես անապահով ուսանողի' լուծելու ոչ միայն ուսման վարձի, այլև ուսումնական գործընթացի հետ առնչվող այլ ծախսեր:

Օրենքի նախագծի ընդունումը նաև կնպաստեր բարձրագույն և միջին մասնագիտական կրթության մատչելիության բարձրացմանը, կխթաներ ուսման առաջադիմությունը:

Ոչ վաղ անցյալում Կառավարությունը մերժեց ՕԵԿ խմբակցության մեկ այլ նախագիծ՝ «Նորաստեղծ ընտանիքներին միանվագ դրամական օգնություն տրամադրելու մասին»: Այդ նախագծի ընդունման անհրաժեշտության մեր հիմնավորումը հետևյալն է՝ հաշվի առնելով Հայաստանում ծնելիության ցածր մակարդակը, որը պայմանավորված է նաև ամուսնությունների թվի ցածր ցուցանիշով, ինչպես նաև ելնելով Հայաստանի դեմոգրաֆիական անվտանգության ապահովման խնդիրներից, անհրաժեշտություն է առաջացել պետության կողմից դրամական միջոցների տրամադրմամբ ՀՀ-ում խրախուսել ամուսնությունները և աջակցել նորաստեղծ ընտանիքներին, որ սոցիալապես անապահով նորաստեղծ ընտանիքը պետությունից միանվագ դրամական աջակցություն ստանա՝ լուծելու առաջնային անհրաժեշտության ծախսերից բխող ֆինանսական խնդիրները:

Այն, որ նման օրենքների ընդունումը կարևոր նշանակություն ունի մեր երկրի համար, անվիճելի է: Իսկ այն, որ Կառավարությունը մերժում է այս օրենքները, փոխարենը ոչինչ չձեռնակելով, առնվազն անընդունելի է»: