ԱՄՆ–ը մտադիր չէ ռազմական միջամտություն ցուցաբերել

ԱՄՆ Սենատի միջազգային հարաբերությունների հանձնաժողովի ղեկավար, դեմոկրատ Ջոն Քերին հինգշաբթի օրն ամերիկյան CBS հեռուստաընկերությանը տված հարցազրույցում բացառել է Սիրիայի հարցով ԱՄՆ–ի կողմից ռազմական միջամտություն ցուցաբերելու հնարավորությունը, հաղորդում է «Ռիա նովոստի»–ն։ 

Նա վերահաստատել է նախագահ Բարաք Օբամայի վերջին հայտարարությունը, որի համաձայն «ԱՄՆ–ը դեռևս հույս ունի Սիրիայի հարցը լուծել դիվանագիտական ճանապարհով, սակայն չի բացառել բոլոր հնարավոր տարբերակների իրագործումը»,– անցյալ շաբաթ հայտարարել է Օբաման։

Ջոն Քերին նշել է, որ ԱՄՆ–ը դեռևս խնդրի կարգավորման միակ միջոցը համարում է ՄԱԿ–ի Անվտանգության խորհրդի կողմից ընդունած Սիրիայի հարցով բանաձևերի իրագործումը։  

Մարտի 6–ին նախագահ Բարաք Օբաման և Կոնգրեսի ներկայացուցիչների պալատի խոսնակ Ջոն Բոները հայտարարել էին, որ ԱՄՆ–ն միակողմանիորեն ռազմական գործողություններ չի սկսելու Սիրիայի դեմ։ 

Երկուշաբթի մի շարք հանրապետական սենատորներ ԱՄՆ–ի իշխանություններին Սիրիայի զինված ուժերի վրա օդային հարձակում իրականացնելու կոչ էին արել՝ դրա միջոցով «Բաշար Ասադին իշխանությունից հեռացնելու համար»։