Օբաման Համաշխարհային բանկի նախագահի պաշտոնում կառաջադրի Pepsi-ի ղեկավարին

ԱՄՆ-ի առաջարկած՝ Համաշխարհայային բանկի ղեկավարի թեկնածուների ցուցակում են հայտնվել Pepsi ընկերության գլխավոր տնօրեն Ինդրա Նուուին, ՄԱԿ-ում ԱՄՆ դեսպան Սյուզան Ռայսը, ԱՄՆ նախագահին կից տնտեսական խորհրդի նախկին ղեկավար Լարրի Սամերսը և ԱՄՆ սենատի միջազգային հարաբերությունների հանձնաժողովի ղեկավար Ջոն Քերրին, հաղորդում է Reuters-ը։ 

Ավանդաբար Համաշխարհային բանկի նախագահ է նշանակվում ԱՄՆ-ի ներկայացրած թեկնածուներից մեկը, իսկ Արժույթի միջազգային հիմնադրամի ղեկավար՝ Եվրոպայի ներկայացուցիչը։ 

Քերրին, որը Ջորջ Բուշ կրտսերի մրցակիցն էր 2004-ին ԱՄՆ-ում կայացած նախագահական ընտրությունների ընթացքում, իր ներկայացուցչի միջոցով հայտարարել է, որ հետաքրքրված չէ այդ պաշտոնով և որ այդ հարցով իր հետ որևէ մեկը քննարկում չի անցկացրել։ 

Սամերսը հայտնի է իր սեքսիստական հայացքներով. 20 տարի առաջ նա հրապարակավ կարծիք էր հայտնել, որ կանայք ավելի քիչ մաթեմատիկական ունակություններ ունեն, քան տղամարդիկ։ Սյուզան Ռայսը վերջին շրջանում աչքի է ընկել ՄԱԿ-ում Ռուսաստանի ու Չինաստանի սուր քննադատությամբ՝ կապված սիրիական գործընթացների հետ։ 

Հատկանշական է, որ  Բրազիլիան, Ռուսաստանը, Հնդկաստանը, Չինաստանն ու Հարավային Աֆրիկան վերջին շրջանում բազմիցս հայտարարել են, որ անհրաժեշտ է հրաժարվել Համաշխարհային բանկի նախագահի պաշտոնում ավանդաբար ԱՄՆ-ի թեկնածուի ընտրության ավանդույթից։ Այդ համատեքստում վերլուծաբանները նշում են, որ եթե Բարաք Օբաման առաջարկի այդ պաշտոնը Pepsi-ի ղեկավար Ինդրա Նուուրիին, որը ծնվել է Հնդկաստանում, ապա նա կարող է բոլորի համար ընդունելի թեկնածու լինել։