Գիտնականները շուտով կպարզեն՝ ինչու գոյություն ունի Տիեզերքը. Telegraph

Գիտնականները մոտեցել են այն պահին, երբ կարելի կլինի վստահորեն պատասխանել այն հարցին, թե ինչու գոյություն ունի Տիեզերքը, գրում է Telegraph-ը։

Տարբեր երկրների գիտնականների խումբը, որն աշխատում է Շվեյցարիայի ՑԵՌՆ լաբորատորիայում, «հակաջրածնի» ատոմի կառավարման միջոց է գտել։ 

Հականյութի հետ փոխհարաբերության այս առաջին հաջող փորձը գիտնականների կարծիքով հնարավորություն կընձեռի ավելին իմանալ հականյութի մասին։ 

Հականյութը քայքայվում է ստեղծվելուց անմիջապես հետո, այդ իսկ պատճառով գիտնականները ստիպված են եղել «թակարդներ» տեղադրել վակուումում, ինչից հետո էլ նրանց հաջողվել է շատ թե քիչ հստակ պատկերացում կազմել հականյութի կառուցվածքի մասին։ 

«Մենք ցույց տվեցինք, որ կարող ենք հետազոտել հակաջրածնի ատոմների ներքին կառուցվածքը։ Այժմ մենք գիտենք, որ այն ըստ էության հնարավոր է»,- ասել է գիտնականներից Ջեֆրի Հանգսթը։ 

«Ջրածինը հանդիսանում է Տիեզերքի ամենատարածված տարրը, և մենք շատ լավ ենք պատկերացնում դրա կառուցվածքը։ Այժմ մենք, վերջապես, սկսել ենք պատկերացնել նաև հակաջրածնի կառուցվածքը։ Տարբերվո՞ւմ են դրանք միմյանցից՝ ժամանակը ցույց կտա»,- հավելել է նա։ 

Համաձայն գիտական թեորիաների, Տիեզերքում նյութի ցանկացած տեսակ, որը ստեղծվել է Մեծ պայթյունից հետո, պետք է ունենա հավասար քանակությամբ հականյութ, այն է՝ յուրօրինակ հայելի, որը նույնական է կառուցվածքով, սակայն ունի ուղիղ հակառակ հատկությունները։ 

Խնդիրն այն է, որ երբ նյութի ատոմները հանդիպում են հականյութի համապատասխան տարրերի հետ, միանգամից ոչնչացվում են։ Սա էլ Տիեզերքի գլխավոր գաղտնիքն է՝ ինչպե՞ս է ստացվում, որ նման իրավիճակում մենք գոյություն ունենք։