Սիրիայի Հոմս քաղաքում նորից կատաղի մարտեր են սկսվել

Սիրիայի ընդդիմության կենտրոն համարվող Հոմս քաղաքում առավոտյան կատաղի մարտեր են սկսվել կառավարական զորքերի և ընդդիմության կողմն անցած նախկին զինվորների միջև, հաղորդում է Росбалт–ը։

Ըստ Հյուսիսային Լիբանանում բազավորված սիրիացի ապստամբների՝ մարտերը տեղի են ունենում Ռաստան և Էլ–Կուսեյր քաղաքների մատույցներում։ Ընդդիմությունը կոչ էր արել ուրբաթօրյա նամազից ամիջապես հետո զանգվածային բողոքի ցույցեր անցկացնել։

Նախօրեին, Սիրիայի հարցով ՄԱԿ–ի և Արաբական երկրների լիգայի հատուկ ներկայացուցիչ Քոֆի Անանը, հայտարարել է, որ դեմ է այդ երկրում ցանկացած ռազմական միջամտության։ Նա նշել է, որ Սիրիայի հակամարտությունը ռազմական ճանապարհով լուծելու ցանկացած փորձ չի նպաստի խնդրի կարգավորմանը, այլ հակառակը՝ միայն կբարդացնի իրավիճակը»։ Անանը հակամարտող կողմերին կոչ է արել դադարեցնել բռնությունները, խնդիրը լուծել խաղաղ ճանապարհով։ Նա ավելացրել է, որ ռազմական հեղափոխությունը սպառնում է երկրում անկայունության հետագա խորացմանը։

Ըստ ՄԱԿ-ի վերջին տվյալների՝ 2011–ի մարտից Սիրիայում ընդդիմության և անվտանգության ուժերի միջև շարունակվող բախումների պատճառով զոհվել է ավելի քան 7.5 հազար մարդ։ Մինչդեռ ըստ միջազգային իրավապաշտպան կազմակերպությունների հաղորդած տեղեկությունների, զոհերի թիվը հասնում է 8.5 հազարի։