Գառնու կամրջի վերանորոգմանը կտրամադրվի 110.000 ԱՄՆ դոլար

Գիտություն և Մշակույթ 2 Նոյեմբեր, 2011 16:30

Այսօր Արամ Խաչատրյանի տուն-թանգարանում ՀՀ-ում ԱՄՆ դեսպանությունը նշեց ԱՄՆ դեսպանների մշակութային արժեքների պահպանության հիմնադրամի 10-ամյակը:

Միջոցառման ընթացքում ՀՀ-ում ԱՄՆ դեսպան Ջոն Հեֆերնը և ՀՀ մշակույթի նախարար Հասմիկ Պողոսյանը ստորագրեցին Գառնու միջնադարյան կամրջի վերականգնման մասին արարողակարգային հուշագիրը, որը հիմնադրամի կողմից Հայաստանում իրականացվող ամենամեծ ծրագիրն է: Այդ նպատակով Հայաստանին հատկացվել է 110.000 ԱՄՆ դոլար:

Իր ողջույնի խոսքում դեսպան Հեֆերնը նշեց, որ հիմնադրամի հիմնական խնդիրը' մշակութային արժեքների պահպանումն է: Թեև դեռ Գառնիում չի եղել, սակայն նախատեսել է շուտով այցելել'կամուրջն աշխատանքներից առաջ և հետո տեսնելու համար: Ի դեպ, դեսպանը հարկ համարեց շեշտել, որ կամուրջը վերականգնվելու է' հավատարիմ միջնադարյան կառույցի իր առանձնահատկություններին:

Հիմնադրամի ֆինանսավորմամբ կամրջի վերականգնման ծրագիրն արդեն 5-րդն է, ինչը դեսպանի խոսքերով, խոսում է Հայաստանում խորը մշակութային արժեքների առկայության մասին. «Գառնու կամուրջը միայն հազարամյակների հուշարձան չէ, այն դեռ հազարամյակների գոյություն պետք է ունենա' այդպիսով հիմք հանդիսանալով հայ-ամերիկյան դարավոր բարեկամության»:

ՀՀ Մշակույթի նախարար Հասմիկ Պողոսյանն օրը պատմական համարեց և նկատեց' եթե տղամարդկանց մասին դատում են կանանց նկատմամբ նրանց ունեցած վերաբերմունքով, ապա պետությունների մասին' մշակույթի նկատմամբ վերաբերմունքով.

«Կարևոր է մի հանգամանք. ԱՄՆ-ն ստեղծեց այս հիմնադրամը' ասելով, որ համաշխարհային մշակութային ժառանգությունը պահպանել է պետք' անկախ երկրից»:

Նշենք, որ ԱՄՆ դեսպանների մշակութային արժեքների պահպանության հիմնադրամի ստեղծման գաղափարը հաստատվել է ԱՄՆ կոնգրեսի կողմից 2000թ-ից և այդ օրվանից աշխարհի 100 երկրներում իրականացվել է մշակութային արժեքների պահպանման 640 ծրագիր' 26 միլիոն ԱՄՆ դոլար արժողությամբ: