Նախագահական ընտրություններում հաղթանակը վերջնական չի լինի Էրդողանի համար. թուրքագետ

Թուրքիայի վարչապետ, նախագահի թեկնածու Ռեջեփ Թայիբ Էրդողանը վստահ է, որ հաղթելու է առաջիկա նախագահական ընտրություններում և հաջողությամբ աշխատում է իր թիմի հետ: Թուրքագետ Արտակ Շաքարյանը կարծում է, որ Էրդողանը կհաղթի նախագահական ընտրություններում, սակայն դա նրա համար վերջնական հաղթանակ չի լինելու: «Նա սահմանադրական բարեփոխումների եղանակով կարողացավ հասնել նրան, որ Թուրքիայում նախագահին ընտրի ժողովուրդը, սակայն նրան չհաջողվեց սահմանադրությամբ նախագահին լայն լիազորություններ շնորհել: Այսինքն, եթե Էրդողանը նախագահ ընտրվի, նա կլինի այսպես ասած Անգլիայի թագուհու կարգավիճակում, ձևական նախագահ: Ուստի նա դեռ պետք է փորձի սահմանադրական նոր փոփոխություն նախաձեռնել և լայն լիազորություններ շնորհել նախագահին, Թուրքիան խորհրդարանական երկրից դարձնել կիսանախագահական»,- «Արմենպրես»-ի հաղորդմամբ՝ ասաց Շաքարյանը:

Թուրքագետի խոսքով՝ Էրդողանը նոր սահմանադրական բարեփոխումներ իրականացնելու համար պետք է 2015թ. խորհրդարանական ընտրություններում հաղթանակ տանի, ինչը ևս դժվար է լինելու: «Էրդողանի ղեկավարած «Արդարություն և զարգացում» կուսակցության կանոնադրությունում կա մի կետ, ըստ որի մեկ անձը չի կարող երեք անգամ վերընտրվել որևէ պաշտոնում, ինչի արդյունքում 2015թ. ընտրություններում արդեն Էրդողանի կուսակցության ամենաազդեցիկ 70 պատգամավորներ այլևս չեն կարողանալու ընտրվել: Սա լուրջ խնդիր կլինի Էրդողանի համար, հատկապես այն դեպքում, երբ նա նախագահ դ առնալուց հետո պետք է հրաժարվի կուսակցության նախագահի պաշտոնից: Սա ևս էապես կթուլացնի կուսակցության դիրքերը և դժվար է ասել՝ կկարողան Էրդողանը հասնել իր նպատակներին, թե ոչ, մանավանդ որ Ֆեթուլլահ Գյուլենն էլ իր հերթին ամեն ինչ անում է Էրդողանի կուսակցության դիրքերը թուլացնելու համար»,- նշեց Շաքարյանը:

Թուրքագետն ընդգծեց, որ արդեն խոսակցություններ կան այն մասին, որ Էրդողանը նախագահ դառնալուց հետո փորձելու է վարչապետի պաշտոնում անցկացնել ներկայումս Թուրքիայի արտաքին գործերի նախարար Ահմեդ Դավութօղլուին: «Նա փորձելու է հասնել նրան, որ վարչապետի պաշտոնում նշանակվի թույլ քաղաքական գործիչ, որպեսզի կարողանա կառավարել նրան, իսկ Դավութօղլուն որպես քաղաքական գործիչ թույլ է և չունի մեծ ազդեցություն»,- նշեց նա:

Այս տարի առաջին անգամ Թուրքիայի պատմության մեջ նախագահ ընտրելու իրավունքն ընձեռնվել է ժողովրդին, մինչ այս Թուրքիայի նախագահին ընտրում էր երկրի խորհրդարանը: Օգոստոս 10-ին կայանալիք ընտրություններին մասնակցելու են երեք թեկնածու՝ իշխող «Արդարություն և զարգացում» կուսակցության նախագահ, վարչապետ Ռեջեփ Թայիփ Էրդողանը, երկու խոշոր ընդդիմադիր կուսակցությունների' «Ժողովրդահանրապետական» ու «Ազգայնական շարժում» կուսակցությունների միասնական թեկնածու Էքմելեդդի Իսանօղլուն և քրդական ուժերի ներկայացուցիչ, «Ժողովուրդն երի դեմոկրատական կուսակցության» համանախագահ Սելահեթին Դեմիրթաշը: