«Տիտանիկ»–ի նավապետը, ըստ նոր վարկածի, հնարավոր է հարբած է եղել. ԶԼՄ–ներ

1912 թվականի ապրիլին Ատլանտյան օվկիանոսում խորտակված «Տիտանիկի» նավապետը, այսբերգին բախվելու ժամանակ, հնարավոր է, որ հարբած է եղել, հաղորդում է բրիտանական Sun պարբերականը՝ մեջբերելով նավի ուղևորներից մեկի վերջերս հայտնաբերված նամակում եղած տեղեկատվությունը։ 

Պաշտոնական վարկածի համաձայն՝ 1912 թվականի ապրիլի 14-ի երեկոյան, նավապետը ընթրելուց հետո գնացել է իր նավախուցը։ Վերջին անգամ նրան կենդանի են տեսել նավի ղեկի մոտ։ Սակայն այս տեղեկատվությանն է հակասում նավի ուղևորուհի Էմիլի Ռիչարդսի (Emily Richards) վերջերս հայտնաբերված նամակը, որը նա ուղարկել է իր սկեսրոջը՝ գտնվելով «Կարպատիա» նավի տախտակամածին, որի անձնակազմն իրեն և իր ընտանիքին «Տիտանիկի» մյուս կենդանի մնացած ուղևորների հետ միասին փրկել է մահվանից։ Ռիչարդսի նամակի համաձայն, այսբերգի հետ բախվելու պահին նավապետը եղել է բարում՝ ոգելից խմիչքների ազդեցության տակ, իսկ նավն այդ ժամանակ ուրիշն է վարել։

Մասնագետներն այս մեղադրանքը համարում են խիստ վիճելի, քանի որ այդ փաստի մասին այլ վկայություններ չկան։ Միևնույն ժամանակ նավի կործանումից հետո փրկվածներից շատերը նկարագրել են նավապետի ողբերգական մահը, որը սեփական կամքով ջրասույզ է եղել նավի հետ միասին։ Կարծիք կա, որ կինն այդ նամակը գրելիս եղել է զգացմունքների ազդեցության տակ՝ կապված եղբոր մահվան հետ։