«Թուրքիան ու Քաթարն աջակցում են իսլամիստ ահաբեկիչներին». «Հզբոլլահ»-ի առաջնորդ

Լիբանանում գործող «Հզբոլլահ» կազմակերպության առաջնորդ Հասան Նասրալլահը հայտարարել է, որ Սիրիայի և Իրաքի բռնազավթված տարածքներում «Իսլամական պետություն» հռչակած «Իրաքի և Լևանտի իսլամական պետություն» (ԻԼԻՊ) ահաբեկչական խմբավորմանն աջակցում են Թուքիան և Քաթարը: Այս մասին, ինչպես հաղորդում է «Արմենպրես»-ը, «Հզբոլլահ»-ի առաջնորդը հայտարարել է Լիբանանո ւմ հրապարակվող «Ալ Ահբար» թերթին տված հարցազրույցում:

Մեղադրելով Թուրքիային և Քաթարին ԻԼԻՊ-ին տարբեր տեսակի աջակցություն ցուցաբերելու մեջ՝ Նասրալլահը լիբանանյան քաղաքական կուսակցություններին էլ քննադատել է Սիրիայում գտնվող զինված խմբերին աջակցելու համար:

«Թուրքիան ու Քաթարն աջակցում են ԻԼԻՊ-ին, իսկ Սաուդյան Արաբիան վախենում է ԻԼԻՊ-ից: Իսլամիստ ահաբեկիչներին աջակցում են նաև թեքֆիրչի (անհավատ, աստվածանարգ) մտածողությամբ բոլոր երկրները, ինչպիսիք են Հորդանանը, Սաուդյան Արաբիան և Պարսից ծոցի երկրները», -ասել է նա:

Նասրալլահը վստահեցրել է, որ իրենք մինչև վերջ պայքարելու են ԻԼԻՊ-ի դեմ և պաշտպանելու են երկրի բոլոր քաղաքացիներին՝ մահմեդականներին, քրիստոնյաներին և բոլոր կրոնական փոքրամասնություններին:

Ամերիկյան CNBC հեռուստաալիքը հայտնել է, որ ԻԼԻՊ-ի վիրավոր զինյալները բուժում են ստանում Թուրքիայում: Անդրադառնալով ԻԼԻՊ-ի ղեկավարների հետ Թուրքիայի ունեցած կապերին՝ հեռուստաալիքը հայտնել է, որ այն դեպքում, երբ ԻԼԻՊ-ի զինյալները կոտորածներ են իրականացնում Իրաքում և Սիրիայում, Թուրքիան թիկունքային աջակցություն է ցուցաբերում ահաբեկիչներին: Հեռուստաալիքի կայքում հրապարակված «Ինչու՞ է Թուրքիան աջակցում Իրաքում իսլամական պետության զինյալներին» վերտառությամբ հոդվածում ամերիկյան հեռուստաալիքը հայտնել է, որ Թուրքիան իսլամիստ ահաբեկիչներին աջակցում է Մարդու իրավունքների թուրքական կազմակերպության միջոցով: Հեռուստաալիքը վստահեցրել է, որ այդ կազմակերպության միջոցով իսլամիստներին զենք են մատակարարել Թուրքիայի նախկին վարչապետ և ներկայիս նախագահ Ռեջեփ Թայիփ Էրդողանի որդուն՝ Բիլալ Էրդողանին պատկանող հիմնադրամները: Նշվել է, որ մարդու իրավունքների թուրքական կազմակերպությունը ֆինանսավորողներից մեկն էլ Ալ Կաիդային կից սաուդարաբացի գործարար Յասին Ալ Քադին է, ով նույնպես համագործակցում է Բիլալ Էրդողանի հետ:

Ամերիկյան հեռուստաալիքը նաև հայտնել է, որ ԻԼԻՊ-ի ահաբեկիչ իսլամիստների՝ Թուրքիայում բուժման ծախսերը հոգում է այդ երկրի առողջապահության նախարարությունը: ԻԼԻՊ-ի հետ Թուրքիայի ունեցած կապերի մասին ավելի վաղ հայտնել են նաև «Վաշինգտոն փոստ» և «Ջերուսալեմ փոստ» թերթերը: