Այաթոլլա Ալի Համենեի. «ԱՄՆ այսօր ամենամեծ ահաբեկիչն է աշխարհում»

«ԱՄՆ այսօր ամենամեծ ահաբեկիչն է աշխարհում»,- հայտարարել է Իրանի հոգևոր առաջնորդ Այաթոլլա Ալի Համենեին ուսանողների հետ հանդիպման ժամանակ:

Ըստ նրա Իրանը հարյուրավոր անհերքելի փաստաթղթեր ունի, որոնք ապացուցում են ԱՄՆ-ի ներգրավվածությունը Իսլամական Հանրապետությունում, տարածաշրջանում` մասնավորապես Մերձավոր Արևելքում ահաբեկչական բնույթի գործողությունների մեջ:

«Այդ փաստաթղթերի հրապարակումը կպատռի ամերիկյան մարդու իրավունքների պաշտպանի և ԱՄՆ-ի` ահաբեկչության դեմ պայքարի կեղծ ավանդույթները»,- ասել է հոգևոր առաջնորդը:

Այդ փաստաթղթերի մասին Իրանի իշխանությունները հայտարարել են այն բանից հետո, երբ Վաշինգտոնը մեղադրեց Իրանին ԱՄՆ-ում Սաուդիան Արաբիայի դեսպանի սպանությունը կազմակերպելու մեջ:

Թեհրանը կտրականապես հերքեց այդ մեղադրանքները` դրանք անվանելով «վատ կազմակերպված քաղաքական շոու», որոնց նպատակն էր տարաձայնություններ մտցնել իսլամական ժողովուրդների միջև և նվազեցնել Իրանի աճող ազդեցությունը տարածաշրջանում:

Իրանի հոգևոր առաջնորդի հանդիպումը ուսանողների հետ նվիրված է եղել Թեհրանում ԱՄՆ դեսպանատան շենքի բռնագրավման 32-րդ ամյակին, որը նշվում է նոյեմբերի 4-ին:

Այդ օրը, 1979 թ. իրանցի հեղափոխական ուսանողները ներխուժեցին Թեհրանում ԱՄՆ դեսպանության շենք: Պատանդ էին վերցվել ԱՄՆ-ի մի քանի տասնյակ քաղաքացի-դիվանագետներ և նրանց ընտանիքների անդամներ:

Այդ ժամանակից ի վեր այդ շենքը իրանցիները անվանում են ԱՄՆ-ի «Լրտեսական բույն», որը մինչ օրս դատարկ է և դրա պատերի մոտ պարբերաբար հակաամերիկյան ցույցեր են անցկացվում: Իսկ ԱՄՆ-ի շահերը Թեհրանում պաշտպանում է Շվեյցարիայի դեսպանությունը:

Հաղորդում է ITAR-TASS լրատվական գործակալությունը: