Մենք դեռ բոլշևիկյան իներցիայով ենք գնում առաջ. Պարգև Օհանյանը՝ դատաիրավական «բարեփոխումների» մասին

Դատաիրավական ոլորտում արդյունքներն արդեն իսկ տեսանելի են դառնում, անդրադառնլով դատաիրավական համակարգի բարեփոխումներին՝ ՀՀԿ 13-րդ համագումարում ասաց ՀՀԿ ղեկավար Սերժ Սարգսյանը:

Թե որքանով են տեսանելի արդյունքները դատաիրավական ոլորտում, Լուրեր.com-ը փորձեց ճշտել նախկին դատավոր Պարգև Օհանյանից.

«Ես շատ կուզեի կիսել Սերժ Սարգսյանի լավատեսությունը, բայց, ցավոք, չեմ կարող: Ձգտումը կա, ինչ-որ աշխատանքներ արվում են, բայց պետք են լուրջ կոնցեպտուալ փոփոխություններ: Այսպես՝ զուտ կոսմետիկ փոփոխություններով, չի լինի»,- ասաց Պարգև Օհանյանը:

Անդրադառնալով «ձեռնարկված միջոցառումների վերաբերյալ միջազգային կառույցների' կարծես թե արդեն օրինաչափ դարձած դրական արձագանքների մասին» Սերժ Սարգսյանի խոսքերին, նախկին դատավորն ասաց. «Ես չգիտեմ՝ միջազգային կառույցներն ինչ խորությամբ են ուսումնասիրում: Թե ի՞նչ դրական արձագանք է եղել, ի՞նչ կապակցությամբ՝ ծանոթ չեմ, բայց մենք դեռ բոլշևիկյան իներցիայով ենք գնում առաջ»:

«Մեր դատարանները շատ տխուր վիճակում են, մենք չենք ուզում տեսնել կամ օրինակներ վերցնել զարգացած երկրներից»,- ասաց Օհանյանը:

Օրինակ բերելով Ֆրանսիան, որտեղ քրեական դատավարությունում չկա նախաքննության փուլ՝ նախկին դատավորն ասաց, որ նախաքննությունը ոչ միայն ավելորդ, այլ նաև չարաշահումների տեղիք տվող փուլ է:

«Ոչ հրապարակային պայմաններում, որն արդեն խախտում է մարդու սահմանադրական իրավունքը, քննություն են անում, մարդկանց ազատությունից զրկում, պատժում, թեև օրենքն ասում է, որ խափանման միջոցը՝ կալանավորումը, իր մեջ չպետք է պարունակի պատժի տարրեր: Բայց, փաստորեն, անում են ու պատժում: Սա արդեն լուրջ խնդիր է»,- ասաց մեր զրուցակիցը։ 

Անրադառնալով դատավարական գործընթացներին՝ Օհանյանը նշեց նաև, որ մեր դատավարությունները մրցակցային չեն և օրինակ բերեց Թամամյանի գործով դատավարությունը։ Այդ կապակցությամբ Օհանյանն ասաց. «Դատախազութունը մշտապես նիստի ժամանակ իրեն պահում է իբրև նախագահող: Թամամյանի գործով հեռուստացույցով տեսա, երբ դատախազն ասաց՝ «ես գտնում եմ, որ դատարանը պետք է միջոցներ ձեռնարկի վկաներին ապահովելու ուղղությամբ»։ Ախր, դու ո՞վ ես, գտնես-չգտնես...: Դու չգտնես՝ դատարանը չգիտի՞ ինչ միջոցներ ձեռնարկի կամ չձեռնարկի»:

Ամփոփելով զրույցը՝ Պարգև Օհանյանը, կրկին անդրադառնալով դատաիրավական փոփոխություններին, ասաց. «Դատաիրավական ոլորտում փոփոխություններ չկան։ Կա ձգտում, բայց արդյունք չկա: Չեմ կարողանում բացատրել՝ այն իրական ցանկության բացակայությո՞ւնն է, թե՞ անկարողության հետևանք: Բայց փոփոխություները կլինեն այն ժամանակ, երբ հետաքննությունից հետո գործը միանգամից կմտնի դատարան, ոչ թե նախաքննության փուլ կլինի, հետո էլ դզեն-փչեն, մարդուն կոտրեն»: