Սերժ Սարգսյանը հավատարիմ չի մնացել Ղարաբաղի հարցով 2008-ին տված նախընտրական խոստմանը. Վլադիմիր Կարապետյան

Այսօր կայացած ՀՀԿ 13-րդ համագումարի ժամանակ Սերժ Սարգսյանն անդրադառնալով Լեռնային Ղարաբաղի հարցին` նշեց, որ ԼՂՀ կողմը պետք է դառնա բանակցային լիիրավ կողմ: Լուրեր.com-ը զրուցեց ՀԱԿ արտաքին հարաբերությունների հանձնաժողովի ներկայացուցիչ Վլադիմիր Կարապետյանի հետ և խնդրեց մեկնաբանել Սարգսյանի այս խոսքերը:

«Ես վերապահում ունեմ Սերժ Սարգսյանի ծրագրային դրույթների վերաբերյալ: Այս անգամ այն, ինչ նա ասել է, տարբերվում է նրանից, թե ինչ է ասել 2008 թվականի նախագահական ընտրությունների ծրագրային դրույթներում: Մասնավորապես՝ այն ժամանակ խոսել է այն մասին, որ որպես Լեռնային Ղարաբաղի կարգավորման սկզբունք՝ պետք է Հայաստանի և Ղարաբաղի միջև ընդհանուր սահման լինի: Այնուհետև որևէ խոսքում, որևէ գործողության մեջ մենք չենք տեսել, որ նա հավատարիմ մնա այդ իսկ նախընտրական խոստմանը: Հաշվի առնելով այն, որ փաստորեն Հանրապետական կուսակցությունը և ինքը անձամբ անտեսել են 2008 թվականի իր նախընտրական դրույթը և այլևս ոչ մեկ չի հիշատակում այն, ես ունեմ նաև վերապահում այս դրույթի վերաբերյալ: Հատկապես այն լույսի ներքո, որ Եվրամիությունը օրերս՝ փետրվարի 27-ին ընդունված փաստաթղթում վկայակոչել է Մադրիդյան փաստաթուղթը՝ որպես հիմանական բանակցային փաստաթուղթ, և Մադրիդյան փաստաթղթում Լեռնային Ղարաբաղի ստորագրությունը նախատեսված չէ: Այսինքն՝ ո՞նց պետք է այս պայմաններում ապահովվի Լեռնային Ղարաբաղի լիիրավ կողմ լինելու հանգամանքը։ Հարցեր են առաջանում, որոնց պետք է պատասխան տան իշխանությունները»: