Եգիպտոսում մեկնարկել է նախագահական ընտրարշավը

Եգիպտոսում պաշտոնապես մեկնարկել է նախագահական ընտրարշավը, որի ընթացքում անցկավելու է նախագահի թեկնածուների գրանցում։ Թեկնածուների գրանցումն անցկացվելու է այս ամսվա ընթացքում ցանկացած օր, հաղորդում է Росбалт–ը։

Եգիպտոսի նախագահական ընտրությունները տեղի են ունենալու մայիսի 23–24–ին, իսկ երկրորդ փուլ անցկացնելու դեպքում այն տեղի կունենա հունիսի 16–ին և 17–ին։ 

Համաձայն նոր կանոնակարգի, որի համար Եգիպտոսի ժողովուրդը քվեարկել է 2011–ի մարտին անցկացված համընդհանուր հանրաքվեի ժամանակ, նախագահն անընդմեջ առավելագույնը երկու անգամ ընտրվելու իրավունք ունի։ Նախագահն ընտրվելու է առավելագույնը չորս տարի ժամկետով։ Նախագահի թեկնածու դառնալու համար նաև հստակեցվել է տարիքային սահմանափակումը (առնվազն 40 տարեկան) և քաղաքացիական կարգավիճակը (թեկնածուի և նրա կանանց կամ կնոջ պարտադիր Եգիպտոսի քաղաքացիության առկայությունը)։

Ըստ Եգիպտոսի Կենտրոնական ընտրական հանձնաժողովի որոշման, նախագահի թեկնածուի գրանցվելու համար թեկնածուն ի պաշտպանություն իր առաջադրման Եգիպտոսի 15 նահանգներից 30 հազար ստորագրություն պետք է ներկայացնի ԿԸՀ։

Հիշեցնենք, որ ավելի քան 30 տարի Եգիպտոսը նախագահելուց հետո Հոսնի Մուբարաքն ընդդիմության ճնշումների տակ 2011–ի փետրվարի 11–ին հրաժարական տվեց և հեռացավ իշխանությունից, ինչից հետո երկիրը կառավարվում է ռազմական իշխանության կողմից։