Թուրքիայում ԱԳՆ-ի ղեկավարի նոր անուն է շրջանառվում

Ռեջեփ Թայիփ Էրդողանի նախագահ ընտրվելուց հետո վարչապետի պաշտոնում նշանակված արտգործնախարար Ահմեթ Դավութօղլուին փոխարինողի նոր անուն է սկսել շրջանառվել: Ինչպես հաղորդում է «Արմենպրես»-ը, թուրքական «Ենի շաֆագ» թերթը գրում է, որ Թուրքիայի ԱԳՆ-ի նոր ղեկավարի հավանական թեկնածու է նաև Ազգային հետախուզական ծառայության պետ Հա քան Ֆիդանը:

Թուրքիայի իշխող «Արդարություն և զարգացում» կուսակցությանը մոտ կանգնած թերթը ենթադրել է, որ Դավութօղլուի նոր կաբինետում Հաքան Ֆիդանը կարող է զբաղեցնել արտգործնախարարի պաշտոնը:

Թերթը նշում է, որ որպես Թուրքիայի վարչապետ, Դավութօղլու համար հիմնական կլինեն երկու' տնտեսական և արտաքին քաղաքական բլոկներում աշխատանքը:

«Դավութօղլուն նոր կառավարության կազմում տնտեսական զարգացման ոլորտն արդեն առաջարկել է գլխավորել էկոնոմիկայի նախկին նախարար, էկոնոմիկայի գծով փոխվարչապետ Ալի Բաբաջանին: Դավութօղլուի համար մյուս կարևոր պահը «զուգահեռ պետության» դեմ պայքարն ու արտաքին քաղաքականություն ոլորտն է: Այդ ուղղությունների համար ամենահավանական թեկնածում Հաքան Ֆիդանն է, ով լավագույնս է տեղյակ և «զուգահեռ պետությունից», և Քւրդստանի աշխատավորական կուսակցության հետ կապված խնդիրներից, քրդական խնդրի «լուծման գործընթացից» և արտաքին քաղաքականությունից: Ֆիդանը ուղղակի բանակցություններ է անցկացրել Աբդուլլահ Օջալանի հետ: Նա արտաքին քաղաքականության հրապարակում ամենամեծ խաղացողներից է և, ժամանակին դուրս գալով Ազգային հետախուզության պատյանից, կարողացել է բավական մեծ առաջընթաց ունենալ: Հաքան Ֆիդանը մասնակցելու է նաև 2015 թվականի խորհրդարանական ընտրություններին»,- նշել է թերթը:

Թուրքական ԶԼՄ-ներն ավելի վաղ հայտնել էին, որ Թուրքիայի արտաքին գերատեսչության ղեկավարի պաշտոնում հավանական թեկնածուներից է նաև Մյովլուդ Չավուշօղլուն, ով Թուրքիայի Եվրամիության հարցերով ներկայիս նախարարն է: