Հալեպի բերդի մոտ պայթյուններ են որոտացել
Մերձավոր Արևելք
Հալեպում ոստիկանության ղեկավարության հին շենքի մերձակայքում 2 պայթյուն են որոտացել: Ինչպես հաղորդում է «Արմենպրես»-ը՝ վկայակոչելով լիբանանյան Ալ Մայադին կայքը, շենքը գտնվում է Հալեպի բերդի մերձակայքում: Այն ամբողջովին ավերվել է, բարեբախտաբար մարդկային վնասներ չեն գրանցվել: Սիրիական բանակը Հալեպի Մուսլիմիա, Զահրաթ աղամասերում զինյալների թաքստոցներ է ոչնչացրել: Պայքարը զինյալների դեմ շարունակվում է Դամասկոսի Ջոբար թաղամասում, որտեղ ռազմական գործողությունների արդյունքում տասնյակ զինյալներ են սպանվել և վիրավորվել:
«Ալ Ջազիրա»-ն տեղեկացնում է, որ կառավարական ուժերը ռմբակոծում են Հալեպի Անդան գյուղը: Բացի այդ, ռմբակոծվում է Մլիհա գյուղը, ավելի քան 25 ռումբ է արձակվել Ջոբար թաղամասի ուղղությամբ:
Սիրիական ՍԱՆԱ գործակալության տեղեկացմամբ՝ Դամասկոսում և մերձակա գյուղերում, ինչպես նաև Լաթաքիայում, Հոմսում, Հալեպում, Ռակկայում, Դարաայում, Դեր Զորում և Իլիբում 183 զինյալ վայր է դրել զենքերը և հանձնվել իշխանություններին: Նրանք պարտավորվել են չկատարել քայլեր, որոնք կսպառնան հայրենիքի անվտանգությանը:
Ավելի վաղ՝ օգոստոսի 30-ին, ևս 40 զինյալ Հոմս քաղաքի տարբեր թաղամասերում հանձնվել են իշխանություններին:
ՄԱԿ-ի տվյալներով՝ սիրիական եռամյա հակամարտության ընթացքում զոհերի թիվը գերազանցել է 150 հազարը:
ՈՒՂԻՂ ԵԹԵՐ
Ամենադիտված 
«Անցած գիշեր Գյումրիի երկնքում բնակիչները ֆիքսել են այսպիսի լուսին». Գագիկ Սուրենյան (տեսանյութ)
