Վանի Սուրբ Խաչ եկեղեցու պատարագից հետո «Խաղաղության սեղան» կբացվի. «Ակոս»

Վանի Աղթամար կղզու Սուրբ Խաչ եկեղեցում իրականացվելիք ամենամյա պատարագից հետո Գևաշի գավառում «Խաղաղության սեղան» կբացվի: Ինչպես հաղորդում է «Արմենպրես»-ը, այս մասին «Ակոս» պարբերականի հետ զրույցում հայտնել է Գևաշի քաղաքապետ Սինան Հաքանը:

Նա տեղեկացրել է, որ սեղանի շուրջ ակնկալում են հյուրընկալել մոտ 100 ուխտավորների: Հաքանի խոսքով' «Խաղաղության սեղանը» կմեկտեղի տարբեր կրոններ և մշակույթներ ունեցող անձանց, ինչն իր նախադեպը դեռ չի ունեցել Գևաշում:

«Գևաշը իսլամի և քրիստոնեության կարևոր կենտրոններից է: Ցանկանում ենք, որ այստեղ եկողներն իրենց զգան ինչպես տեղացիներ: Քանի որ այս մարդիկ մեզ օտար չեն»,- նշել է Հաքանը:

Սեպտեմբերի 7-ին Սուրբ Խաչ հայկական եկեղեցում կիրականացվի 5-րդ պատարագը' 2007 թվականին եկեղեցու վերանորոգումից ի վեր: Ամենամյա պատարագն այս տարի մեկ շաբաթ վաղ կանցկացվի: Արարողությանը ներկա կգտնվեն Պոլսո Հայոց պատրիարքական փոխանորդ Արամ արքեպիսկոպոս Աթեշյանը, ինչպես նաև ԱՄՆ Հայ առաքելական եկեղեցու Արևելյան թեմի առաջնորդ Խաժակ արքեպիսկոպոս Պարսամյանը, Հույն Ուղղափ առ եկեղեցու Տիեզերական պատրիարք Բարդուղիմեոսը և այլոք:

Վանի Սուրբ Խաչ եկեղեցին միակն է պատմական Հայաստանի տարածքում, որտեղ վերանորոգումից հետո գմբեթին խաչ է բարձրացվել: Թուրքիայի մշակույթի և զբոսաշրջության նախարարության ընդունած որոշման համաձայն' թույլատրվել է եկեղեցում տարին մեկ անգամ իրականացնել կրոնական ծիսակատարություն: