Էրդողանը հերքել է Անաստասիադիսի նամակի մասին լուրը

Թուրքիայի նորընտիր նախագահ Ռեջեփ Թայիբ Էրդողանի' նախագահի պաշտոնում առաջին այցը Կիպրոսի թուրքական հատված կատարելուց առաջ Կիպրոսի Հանրապետության նախագահ Անաստասիադիսը նամակ էր հղել նրան, և այդ նամակը, ըստ պնդումների, Էրդողանին հանձնվել էր նրա երդմնակալության արարողության ժամանակ: Սակայն, ինչպես հաղորդում է «Արմենպրես»-ը, CNNTurk հեռուստաալիքը հայտնել է, որ Նիկոսիայում կազմակ երպված մամուլի ասուլիսում Էրդողանը հայտարարել է, որ ինքն Անաստասիադիսից ոչ մի նամակ էլ չի ստացել:

Հեռուստաալիքը խիստ տարօրինակ է համարում իրադարձությունը, քանի որ հասկանալի չէ, թե որն է իրականությունը. նամակ ընդհանրապես եղե՞լ է, և եթե այո, ապա ինչու՞ այն չի հանձնվել Էրդողանին կամ, եթե հանձնվել է, ապա ինչու՞ Էրդողանը հերքում է դա:

Հունաստանի արտաքին գործերի նախարարությունն անօրինական էր բնութագրել Թուրքիայի նորընտիր նախագահ Ռեջեփ Թայիփ Էրդողանի' նախագահի պաշտոնում առաջին պաշտոնական այցը Կիպրոսի թուրքական մաս:

Հունաստանի ԱԳՆ-ի խոսնակ Կոնստանդինոս Կուտրասը հայտարարել էր, որ Կիպրոս կատարած այցին Էրդողանը հանդես է եկել «ագրեսիվ քաղաքականության մեջ համառությունը հաստատող» և «հիասթափեցնող» հայտարարություններով: Կուտրասն ասել էր, որ եթե Թուրքիան ցանկանում է Կիպրոսի խնդրի լուծման հետ կապված բանակցությունները հեշտացնել, ապա պետք է «հետևի Մարդու իրավունքների եվրոպական դատարանի որոշումներին և վերջ դնի կղզու Կիպրոսի Հանրապետությանը պատկանող տնտեսական գոտում ու ափամերձ ջրերում իր անօրի նական գործողություններին»:

Ինքնահռչակ Հյուսիսային Կիպրոսի Թուրքական Հանրապետություն կատարած այցին Էրդողանը հայտարարել էր. «Մեր ցանկությունն է, որպեսզի, հատկապես, որպես երաշխավոր երկրներ, ինչպես Թուրքիան է կատարում իր պարտականությունները, Կիպրոսի հանդեպ նույն կերպ իր պարտականությունները կատարի նաև Հունաստանը: Եթե այդ պարտականությունները կատարվեն, հավատում եմ, որ Կիպրոսի հարցը կարճ ժամանակում լուծում կստանա»: Էրդողանի այդ անպատասխանատու և սադրիչ հայտարարությունն առաջացրել է պաշտոնական Նիկոսիայի և Աթենքի վրդովմունքը: