Պուտինը հակաարևմտամետ չէ, նա հայրենասեր է. Հենրի Կիսինջեր

ԱՄՆ նախկին պետքարտուղար Հենրի Կիսինջերը չի կարծում, որ Ռուսաստանի նախագահական ընտրություններին հաղթանակ տարած վարչապետ Վլադիմիր Պուտինը «հակաարևմտամետ է»։

«Ես չեմ կարծում, որ նա Արևմուտքի դեմ է տրամադրված։ Առաջին հերթին նա՝ Վլադիմիր Պուտինը, հայրենասեր է, որն իրեն նվաստացած է զգում նրանում, որ իբրև թե ինքը իշխանության է եկել Ռուսաստանը 1990–ականները վերադարձնելու նպատակով», – ասել է Կիսինջերը CNN–ին տված հարցազրույցում։

Կիսինջերը մասնավորապես հարցազրույցի ժամանակ նշել է, որ «Պուտինը նաև շատ զգայուն է այն հարցում, որ նա յուրաքանչյուր քաղաքական զարգացում անմիջապես դիտում է՝ որպես միջամտություն Ռուսաստանի ներքին գործերին։ Եվ նույնիսկ ավելին... Բացի այդ, նա կարող է դիտել, և իհարկե նա այդպես էլ անում է՝ իր քաղաքական ընդդիմախոսներին ներքաղաքական զարգացումների ժամանակ ԱՄՆ–ի կողմից ուղղված յուրաքանչյուր խրախուսում, որպես իրեն հեռացնելու և իր ռեժիմը տապալելու փորձ», – հաղորդում է Газета.Ru–ն։

Պուտինը Կիսինջերի հետ վերջին անգամ հանդիպել է Մոսկվայում այս տարվա հունվարի կեսերին։

«Մենք ձեզ վաղուցվա շատ լավ հարաբերություններ ունենք, կարծում եմ, Դուք լավագույն փորձագետներից մեկն եք, այդ թվում ռուս–ամերիկյան հարաբերություններում», – ասել է Պուտինը ԱՄՆ նախկին պետքարտուղարին։

Կիսինջերը խոստովանել է, որ հարաբերությունները իսկապես լավ են. «Մենք հաճախ ենք հանդիպում և անձամբ ես ձեզնից շատ բան սովորեցի. Իսկ հարաբերությունները, որոնք գոյություն ունեն Ռուսաստանի և ԱՄՆ-ի միջև, դա աշխարհի պետությունների հարաբերություններում առանցքային նշանակություն ունի։ Ես հույս ունեմ, որ այդ հարաբերությունները կշարունակեն զարգանալ և բարելավել», – մեջբերում է Ռիա նովոստին Կիսինջերի խոսքերը։

Մինչ այդ, Վլադիմիր Պուտինը և Հենրի Կիսինջերը հանդիպել էին երեք տարի առաջ, երբ նախկին պետքարտուղարը մի շարք ԱՄՆ ազդեցիկ քաղաքական գործիչների հետ ժամանել էր Մոսկվա։ 2009–ի մարտին տեղի ունեցած հանդիպման ժամանակ «Ավելի վաղ հաստատված վստահելի երկխոսության շրջանակներում» քննարկել էին մի շարք թեմատիկ հարցեր միջազգային խնդիրների վերաբերյալ։

Կիսինջերը, որը 1973-1977–ին գլխավորել է ԱՄՆ Պետդեպարտամենտը, համարվում է աշխարհի լավագույն և ազդեցիկ փորձագետներից մեկը միջազգային հարաբերությունների ասպարեզում։ Նա համարվում է 1970–ականներին ԱՄՆ–ի, Խորհրդային Միության և Չինաստանի միջև լարված  հարաբերությունների թուլացման հիմնական աջակիցը և գլխավոր դերակատարներից մեկը։