Ստամբուլի մի մասը կարող է վերանալ

ԱՄՆ-ի և Թուրքիայի մասնագետների անցկացրած հետազոտությունների արդյունքում հայտնի է դարձել, որ Մարմարա ծովում սպասվող մեծ երկրաշարժի էպիկենտրոնը գտնվելու է Ստամբուլից 8 կմ հեռավորության գտնվող «Շահզադե կղզիների հատված» կոչված սեյսմիկ օջախում: Այս մասին, ինչպես հաղորդում է «Արմենպրես»-ը, հայտնում են թուրքական ԶԼՄ-ները' նշելով, որ այդ տարածքում վերջին հզոր երկրաշարժը տեղ ի է ունեցել 250 տարի առաջ:

Մասնագետների կարծիքով' Մարմարա ծովի խորության վրա գտնվող այդ սեյսմիկ դատարկության արևմտյան մասում երկրակեղևի որևէ ցնցում չի գրանցվել: Դեռևս հայտնի չէ, թե նվազագույնը 7 բալ ուժգնությամբ ենթադրվող երկրաշարժը երբ և կոնկրետ որ հատվածում կարող է լինել:

Մասնագետները նշում են, որ երկրաշարժերն առաջ են ընթանում արևելքից դեպի արևմուտք, ենթադրում, որ 1999 թվականին տեղի ունեցած «Գյոլջյուք» երկրաշարժից հետո հերթական երկրաշարժի էպիկենտրոնը լինելու է Ստամբուլը:

Մասնագետները հիշեցնում են «Գյլոչյուք» երկրաշարժի ժամանակ հազարավոր մարդկանց մահը և նշում, որ խիստ կարևոր է կանխարգելիչ միջոցների ձեռնարկումը:

Թուրքական ԶԼՄ-ներն ավելի վաղ հայտնել էին երկրաշարժագետների այն կանխատեսումների մասին, որ առաջիկա 50 տարիների ընթացքում Ստամբուլի շրջանում ենթադրվող երկրաշարժը կարող է վերացնել այդ հսկա քաղաքի կեսից ավելին և մարդկային մեծ կորստի պատճառ դառնալ: