Ռուսաստանը պատրաստ է համաձայնության գալ Սիրիայի հարցով ՄԱԿ-ի Անվտանգության խորհրդի բանաձևի շուրջ. Սերգեյ Լավրով

Ռուսաստանը պատրաստ է համաձայնության գալ Սիրիայի հարցով ՄԱԿ-ի Անվտանգության խորհրդի բանաձևի շուրջ, բայց հիմնականում Արաբական երկրների լիգայի հետ համաձայնեցված հինգ սկզբունքների հիման վրա։ Այս մասին Ռուսաստանի ԱԳ նախարար Սերգեյ Լավրովը հայտարարել է ՄԱԿ–ի ԱԽ–ի երկուշաբթի կայացած նիստի ժամանակ, հաղորդում է «Ռիա նովոստի»–ն։

«Այդ կտրվածքով մենք պատրաստ ենք բանակցել Սիրիայի հարցով ՄԱԿ-ի Անվտանգության խորհրդի բանաձևի շուրջ, որին մենք պատրաստ էինք դեռևս անցյալ տարի աշնանը, երբ մենք խնդրի կարգավորման մեր բանաձևն էինք առաջարկում, ցավոք ՄԱԿ–ի ԱԽ անդամ երկրներից մի քանիսը չընդունեցին այդ նախագիծը», – ասել է Լավրովը, ելույթ ունենալով «Իրավիճակը Մերձավոր Արևելքում. մարտահրավերներ և հնարավորություններ» թեմայով հանդիպման ժամանակ։

Հիշեցնենք, որ մարտի 10–ին ՌԴ ԱԳ նախարար Սերգեյ Լավրովը և Արաբական երկրների լիգայի արտգործնախարարները Սիրիայի խնդրի կարգավորման հարցով համաձայնության էին եկել հինգ հիմնական սկզբունքների շուրջ, որոնք են՝ բռնությունների դադարեցումը, մոնիտորինգ անցկացնելու մեխանիզմի մշակումը, սիրիացիներին անհապաղ մարդասիրական օգնություն ցուցաբերելը, Սիրիայի հարցով ՄԱԿ–ի և ԱՊԼ–ի հատուկ բանագնաց Քոֆի Անանին աջակցություն ցուցաբերելը և Սիրիայի ներքին գործերին արտաքին միջամտություն չթույլատրելը։