Հնարավոր է Ղազախստանից ցորեն ներկրվի

Նոյեմբերի 2-ին ՀՀ գյուղատնտեսության նախարար Սերգո Կարապետյանը Հայաստանում Ղազախստանի արտակարգ և լիազոր դեսպան Ա. Բոզժիգիտովի խնդրանքով ընդունել է վերջինիս։
        Անդրադառնալով հայ-ղազախական դարավոր շփումներին, կողմերը ցանկություն են հայտնել առավել ակտիվացնել երկու երկրների միջև առկա տնտեսական կապերը, հանգամանորեն կանգ առնելով գյուղատնտեսության ոլորտում հնարավոր համագործակցության ոլորտների վրա։
        Դեսպան Բոզժիգիտովը անդրադարձել է նաև ղազախական ցորենի գնումների հարցին։ Այս տարի Ղազախստանը ցորենի հիանալի բերք է աճեցրել, և ցանկալի կլիներ, որ Հայաստանը ցորենի գնումների իր պահանջարկն ապահովեր Ղազախստանից,- ասել է նա, տեղեկացնելով նաև, որ ղազախական կողմը պատրաստ է գնումների գործարքն իրականացնել այլընտրանքային վճարումների եղանակով՝ նկատի ունենալով գնումների դիմաց ոչ անմիջականորեն և ամբողջությամբ վճարելու պայմանը։
        Նախարար Սերգո Կարապետյանը խոստացել է առաջարկը փոխանցել հացահատիկի ներկրմամբ զբաղվող գործարարներին։
        Նախարարը հետաքրքրվել է նաև Ղազախստանում արտադրվող պարարտանյութերով, թունաքիմիկատներով և գյուղատնտեսական տեխնիկայով, առավել մանրամասն տեղեկատվություն խնդրել վերջիններիս մասին, և առաջարկել ղազախական ներդրողներին իրենց բիզնեսը կազմակերպել Հայաստանի գյուղատնտեսության ոլորտում, որի համար կան բոլոր նպաստավոր պայմանները։ Կողմերը հավաստել են, որ երկկողմ համագործակցության համար առկա է մեծ ներուժ և պատրաստակամություն հայտնել՝ նպաստել վերջինիս նպատակային օգտագործմանը։