«Եթե ես լինեի Սերժ Սարգսյանի փոխարեն...»

Սուրեն Սուրենյանցը ֆեյսբուքյան իր էջում գրել է.

«Եթե ես լինեի Սերժ Սարգսյանի փոխարեն...

Կրկին ուզում են անդրադառնալ Սյունիքի մարզպետի թեմային:

Այս անգամ մի կողմ եմ թողելու էմոցիաները, համակրություններն ու հակակրությունները:

Ինչպիսի՞ մարզպետ է պետք հանրապետության նախագահին:

Մարդ, ով կարողանա արդյունավետ իրականացնել քաղաքական ու վարչական կառավարում:

Վահե Հակոբյանի մարզպետության շրջանում անգամ՝ ՀՀԿ-ն հենվում էր Սուրիկ Խաչատրյանի ստրուկտուրալ կառույցների վրա. պատահական չէ, որ ՏԻՄ ընտրություններում հաղթում էին նրա մարդիկ:

Մի առիթով ասել և հիմա կրկնվեմ՝ եթե այս պահին Սյունիքում մարզպետի պաշտոնն ընտրովի լինի, հաղթելու է հենց Սուրիկ Խաչատրյանը:

Սա է այսօրվա իրականությունն՝ անկախ իմ կամ մյուսի ցանկություններից:

Գիտեմ, որ գրածս շատերին գուցե դուր չգա, բայց Սյունիքում այս տարիներին այդպես էլ չի ձևավորվել այլընտրանքային որևէ թիմ, խումբ, որը կարողանա վերահսկել մարզը, իրականացնել տարածքային կառավարում, սպասարկել թիմի քաղաքական շահերը:

Մարդիկ, ովքեր այսօր ընդդիմանում են Սուրիկ Խաչատրյանի վերանշանակմանը, անցած մեկ ու կես տարվա ընթացքում կարող էին մասնակցել ու հաղթել ՏԻՄ ընտրություններում:

Չեն արել:

Եթե հիմա դարձյալ ուրիշ մարզպետ է նշանակվելու, սակայն համակարգը շարունակելու է գործել Խաչատրյանի տրամաբանությամբ, ապա մեկ տարի, երկու տարի հետո դարձյալ անդրադառնալու ենք այս խնդրին:

Ստեղծվել է մի իրավիճակ, երբ Սյունիքի էլիտան, հանրապետության իշխանությունն ուզում են մարզպետի պաշտոնում տեսնել Սուրիկ Խաչատրյանին, սակայն նշանակումն ուշանում է, որովհետև դրան ընդդիմանում է երևանյան քաղաքականցված մի փոքր խումբ:

Ես կարծում եմ՝ շռայլություն է, երբ Սյունիքի նման ռազմավարական մարզը տևական ժամանակ մարզպետ չունի՝ մանավանդ, որ կոնկրետ անձի շուրջ կոնսենսուսը վաղուց ձևավորված է...

Եթե ես լինեմ Սերժ Սարգսյանի փոխարեն, չեմ հապաղի...»: