«Չորրորդ ինքնիշխանություն». Վարդան Ղուկասյանը չգիտի` ինչու Է գնել Թումանյանի տունը

Պարզվում է Գյումրու քաղաքապետ Վարդան Ղուկասյանը ինքն էլ չգիտի, թե ինչու Է գնել մեծ լոռեցու՝ Հովհաննես Թումանյանի Թբիլիսիում գտնվող տուն-թանգարանը: «ՉԻ» հարցին ի պատասխան նա հենց այդպես էլ ասաց. «Ճիշտն ասած, դա չգիտեմ ինչու ես որոշեցի, բայց երբ որ լսեցի, որ նմանատիպ խնդիր կա, ես զանգ եմ տվել Լևոն Անանյանին և ասել եմ, որ մենք պատրաստ ենք գնելու: Իրենք ասեցին, որ մարդ կա գնող, և էդպես մնաց: Հետո, երբ եկանք Գյումրի և տեսանք, որ էդ հարցը չի լուծվել, մեկից մեր ցանկությունը հայտնեցինք, որ էդ բնակարանը գնեինք»: Փորձեցինք ճշտել, թե արդյոք Վարդան Ղուկասյանը գոհ է մեր երկրի սոցիալ-տնտեսական վիճակից: Ի պատասխան՝ նա նշեց. «Ճիշտն ասած, մենք դեռ 20 տարի է, որ անկախացել ենք ու մենք էդ 20 տարվա մեջ ինչ ենք ուզում: Փառք Աստծու, որ էսօր կայուն երկիր ենք: Ես դրսի հետ շատ եմ շփվում, երկրներ կան, որ 100 տարի անկախ են, բայց էնտեղ, որ նայում ես, խայտառակություն է համեմատելով մեր երկրի հետ: Փառք Աստծու, շատ լավ է: Կամաց-կամաց մեր ազգը էնպիսի ազգ է, որ անհնարին բան է, որ մենք հանկարծակի տեղում դոփենք: Մենք պետք է վերև բարձրանանք: Էսքան էլ որ կանք՝ փառք տվեք Աստծուն»: Վարդան Ղուկասյանը համեստորեն լռեց այն մասին, որ զարգացման գոտի համարվող Գյումրին դեռ չի ձերբազատվել աղետի գոտի հասկացությունից: Փոխարենը նա հպարտությամբ փաստեց, որ ՀՀԿ-ի ռեյտինգը բավական բարձրացել է գյումրեցիների մոտ: