PKK-ն պատերազմ է հայտարարում Թուրքիային

Թուրքիայի և քրդերի միջև հարաբերությունները կրկին լարվել են:

Ինչպես հաղորդում է «Արմենպրես»-ը' վկայակոչելով թուրքական ԶԼՄ-ները, Քուրդիստանի աշխատավորական կուսակցության (PKK) զինյալ թևի առաջնորդ Մուրադ Քարայըլանը «Իրաքի և Լևանտի իսլամական պետություն» (ԻԼԻՊ) ահաբեկչական խմբավորման կողմից Սիրիայի Քոբանիի շրջանում քրդական բնակավայրերի վրա կատարած հարձակումների հետ կապված հայտարարել է, որ Թուրքիան դավաճանել է քրդերին:

«Մենք փաստաթղթեր ունենք, Թուրքիան մեկ անգամ ևս հարվածեց մեզ մեր թիկունքից: Քոբանիի վրա հարձակումը Թուրքիայի հետ ԻԼԻՊ-ի համատեղ ծրագիրն է, և նրանք քրդերին մեկ անգամ ևս հարվածեցին թիկունքից: Սա դավաճանություն է: Մեզ համար այլևս վերացել է խաղաղ գործընթացի իմաստը»,- ասել է նա:

Մուրադ Քարայըլանն ասել է, որ Թուրքիան այլևս չի կարող խաբել իրենց: «Սա պատերազմի հայտարարություն է: Մենք այժմ սպասում ենք Աբդուլլահ Օջալանի որոշմանը»,- ասել է PKK-ի զինյալների առաջնորդը:

ԻԼԻՊ-ի գերությունից 49 թուրք դիվանագետների ազատ արձակվելու մասին տարբեր մեկնաբանություններ են արվում: Էրդողանի կառավարությունը մեղադրվում է ԻԼԻՊ-ի հետ համագործակցության մեջ: ԱՄՆ-ի գլխավորությամբ ՆԱՏՕ-ի կոալիցիային ԻԼԻՊ-ի դեմ ռազմական գործողություններին Թուրքիայի չմիանալը կասկածներ է առաջացրել: Հայտնի է, որ պատանդ պահվող յուրաքանչյուր թուրք դիվանագետի համար ԻԼԻՊ-ը Թուրքիայից 1 մլն դոլար է պահանջել: Ավելին, ԻԼԻՊ-ը Անկարայից պահանջել է ազատ արձակել Թուրքիայում ձերբակալված իրենց մի քանի առաջնորդներին: Որոշ աղբյուրներ էլ նշում են, որ Թուրքիան տանկեր և այլ տեսակի զենքեր է տվել ԻԼԻՊ-ին' պատանդներին ազատելու դիմաց:

Մուրադ Քարայըլանի այդ հայտարարությունը հիմք է տալիս ենթադրելու, որ մոտ ժամանակում վերսկսվելու են Թուրքիայի բանակի և PKK-ի միջև մինչ այժմ 40 հազարից ավելի մարդկային կյանքեր խլած զինված բախումները:

Նշվում է նաև, որ թուրք դիվանագետներին ԻԼԻՊ-ի գերությունից ազատել են ԱՄՆ-ի հատուկ ծառայությունները, որպեսզի Թուրքիային ստիպեն միանալ ԻԼԻՊ-ի դեմ ռազմական գործողություններին: