Մշակույթի նախարարությունն ուսումնասիրում է Մոզրովի քարանձավի փլուզման մասին տեղեկությունների հավաստիությունը

ՀՀ մշակույթի նախարարությունն այժմ փորձում է ճշտել Մոզրովի քարանձավի փլուզման մասին տարածված տեղեկությունների իսկությունը։ «Տարածվել են տեղեկություններ, որ այնտեղ վթարային վիճակ է, մեր տարածքային կառույցներն այնտեղի իրենց ներկայացուցչին են ուղարկել՝ ուսումնասիրելու, տեսնելու, թե ի՞նչ է կատարվել և ինչի՞ մասին է խոսքը», – Լուրեր.com-ի հետ զրույցում նշեց մշակույթի նախարարության հասարակայնության հետ կապերի բաժնի ղեկավար Գայանե Դուրգարյանը։  

Հարցին, թե կարելի է արդյոք դրանից եզրակացնել, որ քարանձավի փլուզվելու վերաբերյալ տեղեկությունները հստակ չեն, վերջինս պատասխանեց, որ իրենք նման տեղեկություններ չունեն։ «Ժամանակ առ ժամանակ այնտեղ դիտանցում է կատարվում, ուսումնասիրում են, տեսնում են հուշարձանի վիճակը ինչպիսին է, և երբ ինչ–որ բան է խախտվում կամ խաթարվում, այդ ուղղությամբ քայլեր են ձեռնարկվում», – նշեց նա՝ նաև պատասխանելով այն հարցին, թե մինչ այժմ տարվել են արդյոք հուշարձանի պահպանության ուղղությամբ աշխատանքներ։

Իսկ հարցին, թե ավերված լինելու դեպքում հուշարձանը հնարավոր կլինի՞ վերականգնել, Դուրգարյանը պատասխանեց, թե մինչև իրավիճակին չծանոթանան, չի կարող այդ հարցին պատասխանել։  Ըստ նրա՝ վթարային որևէ տեղեկություն գրանցված չի եղել , իսկ այժմ դա կարող է կլիմայական որոշակի պատճառներ ունենալ։

Հիշեցնենք, որ Երիտասարդ անձավագետների միությունը և Հայաստանի քարանձավագիտության կենտրոնը այսօր հայտնել են, որ փլուզվել է Հայաստանի բնության հուշարձաններից մեկը՝ հանրահայտ Մոզրովի քարանձավը, որը ՀՀ կառավարության որոշմամբ ընդգրկված է Պատմության և մշակույթի անշարժ հուշարձանների պետական ցուցակում: