Դամասկոսի թաղամասերում հրասանդներ են ընկել

Դամասկոսի Ջարամանա արվարձանում և Քաշքուլ թաղամասում հրասանդներ ընկնելու հետևանքով 5 քաղաքացի է վիրավորվել: Ինչպես հաղորդում է «Արմենպրես»-ը՝ վկայակոչելով սիրիական ՍԱՆԱ գործակալությունը, ոստիկանությունը տեղեկացնում է, որ բացի մարդկային վնասներից նյութական վնասներ են կրել մոտակայքում գտնվող տները, մեքենաները: Ջարամանա արվարձանի Քարամ Սամադի և Ջամիաթ թաղամասերում 7 հրասանդ է ընկել: Նախօրեին 2 երեխա վիրավորվել էր Ջարամանայի Կարյաթ թաղամասում հրասանդ ընկնելու հետևանքով: Սիրիական բանակը հաջողություններ է գրանցել Դամասկոսի Ջոբար թաղամասում՝ լուրջ վնասներ հասցնելով զինյալներին: Սպանված զինյալների թվում եղել են հորդանանցիներ, իրաքցիներ և թունիսցիներ:

Սիրիացի ակտիվիստները տեղեկացնում են, որ ուժգին պայթյուն է որոտացել Սիրիայի հարավում: Պարզվել է, որ պայթեցվել է հարավային շրջանները, այդ թվում Դամասկոսն էլեկտրակայանները սնուցող գազատարը: Պայթյունի հետևանքով հոսանքազրկվել են հարավային շրջանները, այդ թվում՝ Դամասկոսը և մերձակա գյուղերը:

Մարդու իրավունքների պաշտպանության մոնիթորինգի կենտրոնը տեղեկացրել է, որ Սիրիայում նախօրեին 31 մարդ է զոհվել, այդ թվում՝ 8 երեխա:

ՄԱԿ-ի տվյալներով՝ Սիրիայում 3,5 տարի շարունակվող բախումների զոհ են դարձել ավելի քան 190 հազար մարդ: