ՀՀ Մշակույթի նախարար Հասմիկ Պողոսյանն ընդունել է ՀՀ-ում Ռումինիայի Արտակարգ և լիազոր դեսպանին

ՀՀ մշակույթի նախարար Հասմիկ Պողոսյանը hանդիպման ընթացքում ՀՀ-ում Ռումինիայի Արտակարգ և լիազոր դեսպան Կրինա Ռոդիքա Պրունարիուին ներկայացրեց տարվա կարևորագույն մշակութային ծրագրերը՝ հրավիրելով մասնակցելու Երևանը 2012 թ. գրքի համաշխարհային մայրաքաղաք հռչակելուն և հայ գրատպության 500-ամյակին նվիրված մեծամասշտաբ միջոցառումներին ռումինական պաշտոնական և մշակութային պատվիրակությանը: Նախարարը մասնավորապես անդրադարձավ Երևանում ապրիլի 21-23-ը անցկացվող «Հայ գրքի «ArmBookExpo»» ցուցահանդեսին Հայաստանի ու հայերի մասին գրականությամբ ռումինական հրատարակչությունների մասնակցությանը, ինչպես նաև՝ աշնանը նախատեսվող աշխարհի տպագիր առաջին գրքերի ցուցահանդեսին, ի թիվս այլ երկրների, ռումինական առաջին տպագիր նմուշի ներկայացմանը: Նախարար Հասմիկ Պողոսյանը դեսպանին տեղեկացրեց նաև, որ Հայ գրատպության 500-ամյակին նվիրված միջոցառումների շրջանակում 2013 թ. Ռումինիայում կազմակերպվելու է հայ հնատիպ գրքի ցուցահանդես:

Կողմերը հանդիպման ընթացքում անդրադարձան նաև այս տարի Ռումինիայում անցկացվող միջազգային գիտաժողովին՝ նվիրված տեղի հայկական մշակութային ժառանգության ներկայացմանը, այդ ժառանգության համատեղ ուսումնասիրմանն ու գիտական գնա­հատմանը: Քննարկվեց նաև Երևանում այս տարի նախատեսվող ռումինահայ նկարիչ Միկլոշ Յակոբովիչի անհատական ցուցահանդեսի կազմակերպական խնդիրները: