CNN. Օքլենդում ցուցարարները դադարեցրել են նավահանգստի աշխատանքները

«Wall Street» շարժման հազարավոր մասնակիցներ դադարեցրել են Օքլենդ քաղաքում գտնվող նավահանգստի աշխատանքները, որը համարվում է Միացյալ Նահանգների ամենախոշոր նավահանգիստներից մեկը։ Օքլենդ քաղաքում գտնվող նավահանգստի ղեկավարությունը հաստատել է, որ ներկայումս դադարեցվել են բեռնափոխադրումները։  Բացի այս ամենից չորեքշաբթի օրը ցուցարարները խափանել էին քաղաքի բանուկ փողոցների աշխատանքը, որը հանգեցրել էր ոստիկանության և ցուցարարների միջև լուրջ բախումների, ինչի հետևանքով   ցուցարարներից մեկը լուրջ վնասվածքներ էր ստացել: 24-ամյա Սքոտ Օլսենը՝ ով նավահանգստի աշխատողներից է, աշխատավայրում գլխին լուրջ հարվածից վնասվածքներ է ստացել, ինչը ամերիկյան մամուլը լայնորեն լուսաբանել էր։ Այդ ամենից ոգեշնչված «Wall Street»–ի շարժման մասնակիցները նոր բախումներ էին հրահրել։ Այսպիսով, Ֆիլադելֆիայում ոստիկանությունը չորեքշաբթի օրը ձերբակալել է ինը մարդու, ովքեր նստացույց էին կազմակերպել  ԱՄՆ–ի ամենամեծ մալուխային ինտերնետ–ծառայությունների մատակարար «Comcast» կորպորացիայի շենքի դիմաց։ Երեկ Նյու Յորքում մի քանի հարյուր նախկին զինվորականներ հավաքվել են ֆոնդային բորսայի շենքի դիմաց: Նույն օրը Բոստոնում, ուսանողները և արհմիությունների անդամները հավաքվել են «Bank of America»–ի և քաղաքապետարանի շենքերի դիմաց։ Հիշեցնենք, որ «Wall Street»–ի շարժման ակտիվիստները մեղադրում են խոշոր կորպորացիաների կողմից վարվող տնտեսական քաղաքականությունը, որը լուրջ վնաս է հասցնում շարքային ամերիկացիների գրպանին։