Մարզպետը հաստատեց՝ ԲՀԿ-ի տորթերը ընտրակաշառք են, իսկ ՀՀԿ-ինը՝ ոչ

«ՉԻ»-ն Արմավիրի մարզպետ Աշոտ Ղահրամանյանից փորձեց իմանալ, թե արդյոք ճիշտ են շրջանառվող լուրերն այն մասին, որ Արմավիրի դպրոցներում մարտի 8-ի կապակցությամբ նվերներ են բաժանվել դպրոցների տնօրեններին, որոնք ընդունել են միայն ՀՀԿ-ականների կողմից ուղարկված նվերները, իսկ ԲՀԿ-ականների մատուցած նվերները՝ տվյալ պարագայում տորթերը, համարել են ընտրակաշառք և հետ են ուղարկել: Մարզպետ Աշոտ Ղահրամանյանը չհերքեց այս լուրը: Ավելին՝ հաստատելով, նշեց. «Ընդամենը մեկ, թե երկու տեղ է նման դեպք եղել»: Վերջինս նաեւ փոխանցեց. «Ես խոսել եմ դպրոցների տնօրենների հետ, պարզվեց, որ առանց տնօրեններին տեղյակ պահելու, ինչ-որ մարդիկ նվերներ են բաժանել եւ դա էլ եղել է նվերների՝ հետ վերադարձնելու պատճառը: Մի քիչ հարգանքի նշան է, որ առանց տվյալ հիմնարկի ղեկավարին տեղյակ պահելու՝ ինչ-որ բան են բաժանում: Մնացած տեղերում ընդունվել են»: Մարզպետը հարկ չհամարեց պատասխանել հարցին, թե եղել են դպրոցներ, որոնց տնօրենները զգուշացված են եղել, բայց, այնուամենայնիվ, միայն ՀՀԿ-ի նվերներն են ընդունել: Մինչդեռ մեր տեղեկություններով ՀՀԿ-ական մարզային «գործիչներն» են հրահանգել տնօրեններին հետ ուղարկել ԲՀԿ-ի ուղարկած տորթերը՝ հայտարարելով, թե իրենք ընրակաշառք չեն ընդունում: