Կնշանակի Սերգո Երիցյանին

Երեկ ավարտվել է Լեզվի պետական տեսչության պետի թափուր տեղի մրցույթը, որին մասնակցում էին երեք քաղաքացի՝ Եսայի Թադևոսյանը, Սերգո Երիցյանը եւ նրա տեղակալ Մարինե Հովյանը: Եսայի Թադեւոսյանը չի հաղթահարել առաջին փուլը, իսկ մյուս մասնակիցները՝ Լեզվի պետական տեսչության պետի պաշտոնակատար Սերգո Երիցյանը և նրա տեղակալ Մարինե Հովյանը անցնելով երկրորդ փուլ՝ համարվել են հաղթողներ: Երկու հաղթողի դեպքում՝ նշանակումն իրականացնում է ՀՀ կրթության եւ գիտության նախարարը, այս դեպքում՝ Արմեն Աշոտյանը:

«ՉԻ»-ն հետաքրքրվեց նախարար Արմեն Աշոտյանից՝ ում է պատրաստվում նշանակել Լեզվի պետական տեսչության պետ՝ Սերգո Երիցյանին, թե Մարինե Հովյանին: Վերջինս կատակով նկատեց, որ ֆեյսբուք սոցիալական ցանցում քվեարկություն է ընթանալու, որի արդյունքում էլ պարզ կդառնա, թե ով է հաղթողը: Իսկ ավելի լուրջ՝ նա ասաց, թե սահմանված ժամկետում կիմանանք, թե ում է տալու նախապատվությունը: Նկատենք, սակայն, որ մեր տեղեկություններով ՕԵԿ-ական Սերգո Երիցյանն է վերստին նշանակվելու Լեզվի պետական տեսչության պետի պաշտոնում: Փաստորեն Աշոտյանը եւս չի կարողանում ձերբազատվել ՕԵԿ-ական կադրերից. թերեւս մնում է եզրակացնել, որ որոշումը պարտադրված է շատ վերեւներից: Այնպես որ՝ շարունակեք լուրջ չվերաբերվել քաղծառայության մրցույթներին, որովհետեւ առանձնապես կարեւոր չէ՝ հաղթել եք այդ մրցույթում, թե՝ ոչ. կարեւորը՝ «թափով ծանոթի» առկայությունն է: