Եկել է ԼՂ հակամարտությունը լուծելու ժամանակը. Գերմանիայի ԱԳ նախարար

Տարածաշրջանային այցի շրջանակներում Ադրբեջանում գտնվող Գերմանիայի Դաշնային Հանրապետության արտաքին գործերի նախարար Գուիդո Վեսթերվելեն հարցազրույց է տվել ադրբեջանական ԱՊԱ լրատվական գործակալությանը։

Նա նշել է, որ «արդեն վաղուց ժամանակն է եկել ԼՂ հակամարտությանը լուծում տալու, որը լուրջ խոչընդոտ է հանդիսանում տարածաշրջանի կայունության ամրանդման և զարգացման համար»։ 

Արտգործնախարարը նաև նշել է, որ Գերմանիան անցյալ տարի Բրյուսելում լուրջ դեր է ստանձնել տարածաշրջանում հակամարտությունների կարգավորման գործընթացում Եվրոպական միության դերի բարձրացման ուղղությամբ։ «Եզրակացությունը, որը նախորդ ամիս արել էր ԵՄ Արտաքին հարաբերությունների հանձնաժողովը և ԵՄ հատուկ ներկայացուցչի նոր մանդատը Հարավային Կովկասում լավ հիմք է ծառայում այգ գործընթացում ԵՄ դերի բարձրացման համար։ Դա նպատակ ունի աջակցել և նպաստել ԵԱՀԿ Մինսկի խմբի գործունեությանը, օրինակ վստահության բարձրացման ուղղությամբ», – ասել է Վեսթերվելեն։  

Անդրադառնալով «Արևելյան գործընկերության» ծրագրին՝ նախարարը նշել է, որ այն արդեն ապացուցել է իր արդյունավետությունը։

«Իհարկե, մենք ակնկալում ենք, որ մեր գործընկեր պետությունները և քաղաքացիական հասարակությունն ավելի ակտիվ մասնակցություն ունենա ծրագրին։ Եվ ակնհայտ է, որ այդ համագործակցությունը պետք է հիմնված լինի եվրոպական արժեքների և չափանիշների վրա», - ասել է Վեսթերվելլեն։

Հիշեցնենք, որ մարտի 16-ին ՀՀ ԱԳ նախարար Էդվարդ Նալբանդյանի հրավերով Գիդո Վեսթերվելլեն կայցելի Հայաստան։