Մինչև այս տարվա ավարտը ԱՄՆ–ը կարող է պատերազմ սկսել Իրանի դեմ

«ԱՄՆ–ն և Իսրայելը ռազմական գործողություններ կսկսեն Իրանի դեմ մինչև 2012 թվականի ավարտը»,– գրում է «Коммерсантъ»–ը՝ հղում կատարելով ՌԴ ԱԳՆ բարձրաստիճան աշխատակցին։

«Դա տեղի կունենա մինչև այս տարվա ավարտը։ Իսրայելցիները, ըստ էության, շանտաժի են ենթարկում Օբամային՝ նրան դժվարին իրավիճակում դնելով. կամ նա կաջակցի իրենց պատերազմում, կամ կզրկվի իրենց աջակցությունից (նկատի ունի հրեական լոբբին)»,– դիվանագետի խոսքերն է մեջբերել թերթը։ Միևնույն ժամանակ թերթը նշում է, որ անցած երկուշաբթի Նյու–Յորքում տեղի ունեցած ԱՄՆ պետքարտուղար Հիլարի Քլինթոնի և Ռուսաստանի արտգործնախարար Սերգեյ Լավրովի բանակցությունների ժամանակ, Քլինթոնը խնդրել է Լավրովին հաղորդել իրանական իշխանություններին, որ ապրիլին Իրանի և միջնորդ պետությունների վեցյակի միջև նախատեսված բանակցությունները Թեհրանի վերջին հնարավորությունն է պատերազմից խուսափելու համար։

Թերթի տեղեկություններով՝ Ռուսաստանն արդեն որոշում է ընդունել՝ ինչ պետք է անի պատերազմի դեպքում։ «Մենք նախագծել ենք մեր գործողությունները Իրանի դեմ ԱՄՆ և Իսրայելի հնարավոր պատերազմի դեպքում»,– թերթին է հայտնել ՌԴ ԱԳՆ աշխատակիցը, հաղորդում է ИТАР-ТАСС–ը։