Կին պատգամավորները՝ պատգամավորության թեկնածու Շուշան Պետրոսյանի մասին

Երեկ երգչուհի Շուշան Պետրոսյանը հաստատել էր, որ անդամակցելու է ՀՀԿ կուսակցությանը: Լուրեր.com-ը կին պատգամավորներից, փորձեց պարզել, թե ինչպես են վերաբերվում երգչուհու՝ ԱԺ պատգամավոր դառնալու ցանկությանը:

ՀՀ ԱԺ պատգամավոր, «Ժառանգություն» խմբակցության անդամ Անահիտ Բախշյանը մեզ հետ զրույցում նշեց, որ յուրաքանչյուր քաղաքացի, ով իրեն տեսնում է այդ դերում, և մտածում է, որ կարող է ինչ-որ բան փոխել, ուրեմն պետք է գա քաղաքականություն:

«Շուշանն ասում է, որ ինքը կարող է, և դա նշանակում է, որ ինքը ստանձնում է որոշակի պարտավորություն, իր ազգի, ինչպես նաև իր քաղաքական թիմի համար: Որովհետև քաղաքական թիմը ցուցակի անդամներն են ապահովում: Եթե ինքը տեսնում է իրեն քաղաքականության մեջ, պատրաստ է գալ, աշխատել և օրենսդրական մարմնում ներկայանալի լինել որպես պատգամավոր, ուրեմն շատ ողջունում եմ»,- ասաց Անահիտ Բախշյանը:

ԱԺ պատգամավոր, ԲՀԿ անդամ Նաիրա Զոհրաբյանն էլ ասաց, որ դա ցանկացած մեկի, այդ թվում նաև Շուշան Պետրոսյանի անձնական գործն է:

«Մասնագիտությունը տվյալ դեպքում կապ չունի, կարևորն այն է, թե որքանով է մարդը պատրաստ օրենսդրական գործունեության, որքանով է պատրաստ մտնել ակտիվ քաղաքականություն: Այստեղ է, որ պետք է փնտրել խնդիրը»,- ասաց պատգամավորը:

Զոհրաբյանը մեզ հետ զրույցում նշեց նաև, որ վերջերս նկատում է պատգամավոր դառնալու անհասկանալի մոլուցք և հավելեց. «Երևի թե այդ ցանկությունը բնական է, բայց դրանից հետո պետք է մարդ իրեն երկրորդ հարցը տա՝ ինքը պատրա՞ստ է արդյոք զբաղվել բավականին բարդ օրենսդրական գործունեությամբ: Եթե տիկին Պետրոսյանը գտնում է, որ ինքը կարող է զբաղվել օրենսդրական գործունեությամբ, կարող է իր շոու–բիզնեսը համատեղել պառլամենտական գործունեության հետ… հնարավո՞ր է, թե՞ ոչ, ինչպի՞սի արդյունք կարող է ունենալ տվյալ գործիչը: Ես զերծ կմնամ մեկնաբանելուց»:

ԱԺ պատգամավոր, «Ժառանգություն» խմբակցության անդամ Զարուհի Փոստանջյանը մեզ հետ զրույցում հրաժարվեց իր անձնական կարծիքը հայտնել Շուշան Պետրոսյանի ԱԺ պատգամավոր դառնալու մասին, սակայն հավելեց, որ ոչ մի խնդիր չկա, եթե անձը ցանկանում է իրապես զբաղվել քաղաքականությամբ, և հավելեց. «Այդ քաղաքականությամբ անձը ներկայացնում է հայտ՝ տալով քաղաքական կենսագրություն»:

Պատգամավորը մեզ հետ զրույցում հիշեց ԱՄՆ նախկին նախագահ Ռոնալդ Ռեյգանին, ով նախկինում եղել է դերասան, բայց լավագույնն է ղեկավարել իր երկիրը և ավելացրեց. «Եթե մարդ ցանկանում է քաղաքականությամբ զբաղվել, ոչ մի խնդիր չկա իր մասնագիտության մեջ: Բայց անհրաժեշտ է իր կենսագրությամբ հայտ ներկայացնելիս, հայտնի, թե որն է եղել այն ճանապարհը, որն իրեն բերեց քաղաքականություն»:

ՕԵԿ խմբակցության պատգամավոր Հեղինե Բիշարյանը, մեզ հետ զրույցում նախ նշեց, որ իր համար անակնկալ էր Շուշան Պետրոսյանի պատգամավոր դառնալու ցանկությունը, և հետո ավելացրեց, որ անձն ինքը պետք է որոշի, թե որքանով է պատրաստ քաղաքական դաշտում ակտիվ մասնակցության։ Պատգամավորը նաև նշեց, որ որպես երգչուհի Շուշան Պետրոսյանին շատ է սիրում. «Կարծում եմ նրա անսպառ և գեղեցիկ ձայնը քաղաքական դաշտին խիստ անհրաժեշտ է, բայց որպես պատգամավոր, դա արդեն իր խնդիրն է, ինքը պետք է որոշի»,- ասաց Բիշարյանը և հավելեց, որ գնահատականներ տալ չի ցանկանում: Ճի՞շտ էր, թե՞՝ ոչ դա կերևա այն ժամանակ, երբ նրանք կհայտնվեն ԱԺ-ում: «Նախապես տալ գնահատականներ ճիշտ չէ»,- ասաց պատգամավորը:

Գայանե Համբարձումյան