Թուրքիայում ավտոմեքենան անցել է բողոքի դուրս եկած քրդերի վրայով (տեսանյութ)

Սիրիայի քրդաբնակ Քոբանի քաղաքի վրա «Իսլամական պետություն» (ԻՊ) ահաբեկչական խմբավորման հարձակումների, ԻՊ-ի դեմ միջազգային ռազմական գործողություններին Թուրքիայի հրաժարվելու դեմ ստամբուլաբնակ քրդերի բողոքի ակցիայի ժամանակ աննախադեպ միջադեպ է տեղի ունեցել:

Ինչպես հաղորդում է «Արմենպրես»-ը' վկայակոչելով թուրքական Oda TV հեռուստաալիքը, Ստամբուլի քրդաբնակ Էսենյուրթ թաղամասում Քոբանիում քրդերին պաշտպանելու համար թուրքական պետությանը կոչ անող ակցիայի մասնակիցների վրա «Տոֆաշ» տեսակի ավտոմեքենայով հարձակում է տեղի ունեցել: Ավտոմեքենան վրաերթի է ենթարկել մի քանի ցուցարարների և փախուստի դիմել: Չի բացառվում, որ միջադեպն իրագործվել է սադրանքի նպատակով:

Թուրքական ԶԼՄ-ների համաձայն' Քոբանիի հետ կապված Թուրքիայում քրդերի կողմից անցկացվող բողոքի ակցիաներում ոստիկանության հետ բախումներում զոհված քաղաքացիների թիվն արդեն անցնում է 25-ից: