Ճապոնական Sharp ընկերությունը հետաձգել է նոր iPad–ի էկրանների առաքումը. WSJ

Հեղուկ-բյուրեղյա էկրաններ արտադրող ճապոնական Sharp ընկերությունը հետաձգել է ամերիկյան Apple ընկերության iPad սմարթֆոնի նոր մոդելի էկրանների առաքումը։ Այս մասին գրում է ամերիկյան The Wall Street Journal պարբերականը։

Սկզբում Sharp–ը էկրանների առաքումը պլանավորել էր դեկտեմբերի վերջին, սակայն այդ ընթացքում որոշ դժվարությունների է հանդիպել Apple-ի կողմից խիստ պահանջներ ներկայացնելու պատճառով։

Աղբյուրը նշում է, որ Sharp ընկերությունը, այնուամենայնիվ, կմնա որպես Apple-ի և միևնույն ժամանակ Հարավկորեական Samsung–ի և LG–ի հեղուկ-բյուրեղյա էկրանների մատակարարը։

«Առաքման հետաձգումը ոչ միայն բացասական ազդեցություն կունենա Sharp–ի վրա, այլև մեծ հնարավորություն կտա Samsung–ին Apple ընկերությանը հեղուկ-բյուրեղյա էկրանների խոշոր մատակարար դառնալու համար», – ասել է վերլուծաբան Նոբուո Կուրահասին։

Sharp–ի կողմից էկրանների առաքման ձգձգումը Apple-ին լուրջ կախվածության մեջ է դնում Samsung ընկերությունից, չնայած այն հանգամանքին, որ երկու ընկերությունները մոտ մեկ տարի դատական գործընթացների մեջ են ներգրավված՝ երկուստեք մեղադրելով արտադրանքի տեխնոլոգիաները պատճենելու մեջ։

Չնայած դեռ հայտնի չէ, թե երբ է Sharp–ն առաքելու էկրանները Apple–ին, սակայն, ըստ որոշ աղբյուրների, դա տեղի կունենա այս շաբաթ։ Վերլուծաբանների կարծիքով, միևնույն է դա կհետաձգի նոր iPad-ի մուտքը շուկա, որը սպասվում էր այս ուրբաթ։