Աշխարհի ամենաբարձրահասակ մարդու հասակի աճը կանգնեցվել է

ԱՄՆ-ի Վերջինիա նահանգի համալսարանին կից բժշկական դպրոցի մասնագետներին հաջողվել է կանգնեցնել «Գինես»–ի գրքի ռեկորդակիր, ազգությամբ թուրք, 29–ամյա Սուլթան Կոսենի հասակի աճը, որը համարվում է Երկիր մոլորակի ամենաբարձրահասակ մարդը։

Սուլթան Կոսենը 2–ամյա բուժման կուրս է անցնում ԱՄՆ–ում։ Վերջին 3 ամսվա դիտարկումները հաստատել են, որ նրա հասակը կանգ է առել 2 մ 53 սմ ցուցանիշի վրա։ Հիվանդության պատճառ է հանդիսանում 10 տարեկանում Կոսենի մոտ առաջացած հիպոֆիզի ուռուցքը, և որպես հետևանք աճի հորմոնի գերարտադրությունը։ Կոսենի բուժող բժիշկ էնդոկրինոլոգ Մերի Լի Վանսը մանրամասնել է, որ խոսքը գնում է բարորակ ուռուցքի մասին, որն անբուժելի է մեզ հայտնի մեթոդներով։

2010թ.–ին Կոսենի մասին պատմող «Discovery» հեռուստաալիքի պատրաստած հաղորդումից հետո երիտասարդին առաջարկել էին նորագույն մեթոդներով բուժման կուրս անցնել ԱՄՆ–ում, որի շնորհիվ հաջողվել է աստիճանաբար նորմայավորել աճի հորմոնի արտադրությունը։ Բուժման կուրսն ընդգրկում է ոչ միայն նորագույն դեղամիջոցներ, այլև լազերային վիրաբուժության տարրեր՝ գամմա ճառագայթներով, հաղորդում է «ИТАР-ТАСС»–ը։