Այս տարվա ապրիլին Երեւանում Մոսկվայի օրեր են կազմակերպվելու

ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց Ռուսաստանի Դաշնության տարածքային զարգացման փոխնախարար Մաքսիմ Տրավնիկովին: Այս մասին ասված է ՀՀ ՏԿՆ պաշտոնական կայքում զետեղված հաղորդագրության մեջ։

Զրուցակիցներն ամփոփեցին Հայաստանի Հանրապետության եւ Ռուսաստանի Դաշնության միջեւ տնտեսական համագործակցության միջկառավարական հանձնաժողովի՝ միջտարածաշրջանային համագործակցության հարցերով հայ-ռուսական աշխատանքային խմբի առաջին նիստի արդյունքները: Նշենք, որ հայկական կողմի համանախագահ, ՏԿ նախարարի առաջին տեղակալ Վ. Տերտերյանի եւ ռուսական կողմի համանախագահ Մ. Տրավնիկովի ղեկավարությամբ նիստը տեղի էր ունեցել մարտի 13-ին Գյումրիում:

Աշխատանքային խմբի առաջին նիստի ընթացքում քննարկվել են միջտարածաշրջանային համագործակցության, իրավապայմանագրային բազայի զարգացման, բազմաբնակարան շենքերի կառավարման եւ կոմունալ տնտեսության ոլորտում փորձի փոխանակման ու համագործակցության, տարածքային համաչափ զարգացման ծրագրերի մշակման եւ իրականացման հարցում փորձի փոխանակման, հումանիտար ոլորտում գործակցության հարցեր: Ձեռք են բերվել մի շարք պայմանավորվածություններ: Մասնավորապես՝ ՀՀ քաղաքաշինության եւ ՌԴ տարածքային զարգացման նախարարություններն ավարտին պետք է հասցնեն քաղաքաշինական ոլորտում համագործակցության վերաբերյալ փաստաթղթի նախագծի համաձայնեցումը: Ռուսական կողմը փոխանցել է Հայաստանի կառավարության հետ առեւտրատնտեսական, գիտական եւ մշակութային համագործակցության համաձայնագիր կնքելու վերաբերյալ Արխանգելսկի մարզի պատրաստակամությունը, հայկական կողմն էլ տեղեկացրել է, որ ներկայացվել է Ռոստովի մարզի հետ նմանատիպ համագործակցության համաձայնագրի նախագիծ: Պայմանավորվածություն է ձեռք բերվել, որ աշխատանքային խմբի շրջանակում կկազմակերպվի տարածքային զարգացման ծրագրերի իրականացման եւ մշակման վերաբերյալ երկու երկրների տարածաշրջանների փորձի փոխանակում: Երկու երկրների շահագրգիռ մարմիններին առաջարկվել է աջակցել Երեւանի եւ Մոսկվայի քաղաքային իշխանություններին՝ ընթացիկ տարվա ապրիլին Երեւանում Մոսկվայի օրեր կազմակերպելու հարցում:

Ա. Գեւորգյանն ու Մ. Տրավնիկովը ընդգծելով Հայաստանի եւ Ռուսաստանի միջեւ միջտարածաշրջանային համագործակցության զարգացման կարեւորությունը՝ նշեցին ձեռք բերված պայմանավորվածությունները նախատեսված ժամկետներում կյանքի կոչելու անհրաժեշտությունը:

Զրուցակիցները նաեւ անդրադարձան հայ-ռուսական միջտարածաշրջանային երկրորդ համաժողովի անցկացման կազմակերպչական հարցերին: Արձանագրվեց, որ 2011թ-ին Երեւանում կայացած հայ-ռուսական միջտարածաշրջանային առաջին համաժողովից հետո երկու երկրներում էլ արդեն սպասում են երկրորդ համաժողովին, որի ընթացքում քննարկվելու են գործնական կապերի զարգացման, համատեղ ծրագրերի իրականացման հարցեր: