Մաշտոցի պուրակում լարված իրավիճակ է. միակ վրանը դուրս է բերվել այգուց (Տեսանյութ)

Քիչ առաջ Լուրեր.com–ի խմբագրություն զանգահարեց Մաշտոցի պուրակում անցկացվող բնապահպանական ակցիայի մասնակից Լիլիթ Ղազարյանը և հայտնեց, որ պուրակում այս պահին բավականին լարված իրավիճակ է։

Երեկ՝ մարտի 13-ին, ոստիկանները թույլ էին տվել միայն մեկ վրան պատրաստել գիշերվա համար, որում գիշերել են 4-5 ակտիվիստ, իսկ ոմանք էլ գիշերն անցկացրել էին քնապարկերում։ Քիչ առաջ ոստիկանները, ըստ ակցիայի մասնակիցների, արհեստական աղմուկ են բարձրացրել պուրակի մոտակայքում և քանի դեռ ակտիվիստները զբաղված են եղել պարզելով, թե ինչ է կատարվում, ոստիկանները դուրս են բերել վրանը պուրակի տարածքից։ Ընդ որում, ըստ Լիլիթ Ղազարյանի, վրանում քնած մարդ է եղել, որին, վրանը պուրակի տարածքից դուրս բերելուց հետո, բաց են թողել։

Նշենք, որ Մաշտոցի պուրակում տեղադրված կրպակների ապամոնտաժման համար պայքարող քաղաքացիական նախաձեռնությունների անդամները կրպակներն ապամոնտաժելու համար վերջնաժամկետ են ներկայացրել քաղաքային իշխանություններին, հակառակ դեպքում խոստացել՝ կրպակները սեփական ուժերով ապամոնտաժել: