Հայաստանում մեկնարկում է Ֆրանկոֆոնիա-2012 ծրագիրը

Հայաստանը 2009 թ. ակտիվորեն համագործակցում է Ֆրանկոֆոնիայի միջազգային կազմակերպության հետ և մշտապես մասնակցում վերջինիս կողմից իրականացվող ծրագրերին թե’ Հայաստանում, թե’ արտերկրում: Այդ են վկայում 2009-2011 թթ. Հայաստանում անցկացված ֆրանկոֆոնիայի միջոցառումները (Հայաստանի պետական կոլեկտիվների ելույթներ, հեքիաթասացի օրեր, հանրաճանաչ երգիչ Գարուի մենահամերգ...), ինչպես նաև հայաստանյան պատվիրակության մասնակցությունը Բեյրութում կայացած Ֆրանկոֆոնիայի միջազգային խաղերին:

Այս տարի Հայաստանում ֆրանկոֆոնիայի միամսյակի ծրագիրը կմեկնարկի մարտի 16-ին, Ալ. Սպենդիարյանի անվան ազգային ակադեմիական թատրոնում` Ժ. Բիզեի «Կարմեն» օպերայի համերգային կատարումով:

ՀՀ մշակույթի նախարարության նախաձեռնությամբ ու աջակցությամբ Ֆրանկոֆոնիայի ծրագրի շրջանակներում կիրականացվեն մի շարք միջոցառումներ ևս.
1. Հայաստանի ազգային գրադարանում տեղի կունենան ֆրանսերեն գրականության և Հայաստանի մասին թարգմանական հրատարակությունների շնորհանդեսներ,
2. Խնկո-Ապոր անվան մանկական ազգային գրադարանում կանցկացվեն ֆրանսիական մանկական գրականությանը նվիրված օրեր (մարտի 29-ից ապրիլի 13-ը),
3. Ֆրանսիական գրականության շաբաթվա շրջանակներում տեղի կունենան «Արդի հայ արձակը» և «Արդի հայ պոեզիան» ֆրանսերեն ժողովածուների շնորհանդեսները:

Միամսյակը կեզրափակվի ապրիլի 13-ին՝ Հ. Պարոնյանի անվան երաժշտական կոմեդիայի պետական թատրոնում՝ «French-Bazar» փառատոնային ծրագրով նախատեսված մանկական մյուզիքլով ու համերգով:

Ֆրանկոֆոնիայի օրերին կհաջորդի ՀՀ մշակույթի նախարարության աջակցությամբ իրականացվող մեկ այլ նախաձեռնություն՝ Պատկերապատման 3-րդ միջազգային փառատոնը (մեկնարկը՝ ապրիլի 19-ին), որին իրենց մասնակցությունը կբերեն Ֆրանսիայի Վալանս քաղաքի Ազգային ժառանգության կենտրոնը, հայ պատկերապատողները, նաև հյուրեր եվրոպական մի շարք այլ երկրներից: