«168Ժամ». Արման Վարդանյանը չի պատրաստվում մասնակցել առաջիկա ընտրություններին

Շրջանառվող տեղեկությունների համաձայն՝ Արման Վարդանյանը, որը ոչ վաղ անցյալում ղեկավարել է Երեւան քաղաքի ավագանու «Բարգավաճ Հայաստան» խմբակցությունը, որոշել է մեծամասնական ընտրակարգով առաջադրվել Նոր–Նորք համայնքն ընդգրկող թիվ 2–րդ ընտրատարածքում։ Մինչդեռ մեզ հետ զրույցում Արման Վարդանյանը հերքեց այդ լուրերը։

-Պարոն Վարդանյան Դուք 2009-2010 թվականներին Երևանի ավագանու ԲՀԿ խմբակցության ղեկավարն էիք, ինչպես նաև կրթության, առողջապահության և երիտասարդության հարցերով հանձնաժողովի նախագահն էիք, սակայն միանգամից հրաժարվեցիք ձեր բոլոր պաշտոններից կասեք ինչու՞ և կմանրամասնե՞ք թե ինչով եք հիմա զբաղվում։

-Ձեր նշած տարիներին իմ համագործակցությունը Բարգավաճ Հայաստան կուսակցության հետ հիմնված էր Երևան քաղաքում տեղական ինքնակառավարման ինստիտուտի կայացման աջակցմանը։ Փորձը , որը կուտակվել էր տարբեր երկրների մունիցիպալ իշխանությունների հետ համագործակցության արդյունքում իր կիրառումը գտավ Երևան քաղաքի կառավարման նոր մոդելի շրջանակներում։ Բարգավաճ Հայաստան կուսակցության ավագանու նախընտրական ցուցակը կազմելու ժամանակ որոշվեց առաջնորդվել ոչ թե նեղ կուսակցական կոնյուկտուրայով, այլ մասնագիտական ընտրության տրամաբանությամբ, այսինքն ցուցակում ներգրավել մարդկանց, որոնք տեղական ինքնակառավարման ինստիտուտը ճանաչում են ներսից և ունեն որոշակի քաղաքական փորձ։ Նման ընտրությունը առավել ցայտուն դարձավ երբ ՀՀԿ–ն մեծամասնություն վերցրեց, թողնելով իր հակառակորդներին մեծ հաշվով ոչինչ չորոշող փոքրամասնություն։ Մեր աշխատանքի արդյունքում խմբակցությունը ոչինչ չորոշող փոքրամասնությունից վերածվեց ըմբոստ ու թելադրողի, որի հետ հաշվի էին նստում բոլոր որոշումները կայացնելուց։
Քաղաքականությունը՝ եթե դու այնտեղ ազնիվ մղումներով ես ու այն չես դիտարկում որպես արագ հարստանալու միջոց, մեղմ ասած ոչ շահավետ գործընթաց է։ Եկավ ժամանակ երբ ես ավարտեցի իմ առաքելությունը Երևանի ավագանու կազմում և ամփոփելով գործունեությունս, ներգրավվեցի ավելի մեծ միջազգային նախագծերում։

-Ավագանու նիստերի ժամանակ ձեր հակասությունները քաղաքապետ Գագիկ Բեգլարյանի հետ երբեմն սուր բնույթ էին կրում։ Մամուլը հաճախ էր անդրադառնում այդ հակասություններին…

-Հենց այդ հակասությունների արդյունքում էր կայանում քաղաքային պառլամենտը։ Ընդհանրապես ցանկացած կոլեգիալ մարմնում հակասությունների առկայությունը միայն դրական ընթացքի մասին են վկայում։ Հիշենք ԽՍՀՄ–ը երբ բոլոր որոշումները ընդունվում էին միաձայն ու բուռն ծափերով։ Կարծում եմ այդ համակարգի լճացման ու վերջնական փտմանը նպաստեցին հենց նման եղանակի «քննարկումները»։ Մամուլը իր անդրադաձներում շատ հաճախ անձնավորում էր այդ հակասությունները, սակայն դրանք միշտ եղել են աշխատանքային տարաձայնությունների շրջանակում։ ՀԱԿ–ը չէր մասնակցում ավագանու աշխատանքներին և հակակշռելու ողջ պատասխանատվությունը մեր վրա էր։

-Մայիսին կայանալիք ԱԺ ընտրություններին առաջադրվելու՞ եք:

Ոչ մեծամասնական և ոչ համամասնական ընտրակարգով չեմ առաջադրվելու, չնայած անկեղծ կլինեմ առաջարկներ եղել են ։ Քարոզարշավը ժամանակի առումով ռեսուրսատար է, իսկ ես ներգրաված լինելով միջազգային նախագծերում հաճախ եմ բացակայում երկրից։ ԱԺ–ում օրենսդրական աշխատանքին չափազանց լուրջ եմ վերաբերվում և չեմ ընդունում այն պառլամենտականների մոտեցումը, ովքեր ընտրվելուց հետո եզակի դեպքերում են հաճախում ԱԺ նիստերին և ի վերջո քաղաքականությունը չի սահմանափակվում ԱԺ պատերի ներսում։

-Առաջարկությունները նաև ա՞յլ կուսակցություններից են եղել։

-Այո, ես նշեցի, որ ԲՀԿ հետ ես համագործակցել եմ, սակայն կուսակցական չեմ եղել։ Իմ աշխատանքը Երևանի ավագանիում եղել է ոչ թե կուսակցական, այլ մասնագիտական աշխատանք։

-Դուք ինչպես եք գնահատում ձեր այդ տարիների աշխատանքը:

-Կարծում եմ անհամեստություն կլինի եթե ես գնահատականներ հնչեցնեմ։ Որպեսզի գնահատականը լինի օբյեկտիվ առաջարկում եմ այդ հարցը ուղղել ԲՀԿ։

Հ.Գ. ԲՀԿ նախագահ Գագիկ Ծառուկյանի մամուլի խոսնակ Խաչիկ Գալստյանը մեզ հետ զրույցում բարձր գնահատեց Արման Վարդանյանի հետ համագործակցությունը, նաև արդյունավետ որակեց Վարդանյանի հետ աշխատանքը խմբակցության ղեկավարի պաշտոնում։ Գալստյանւ նաեւ ընդգծեց, որ Արման Վարդանյանը եղել է ԲՀԿ համակիր, իսկ կուսակցական նա երբեք էլ չի եղել։