Հայամետ կոնգրեսական Փալոնեն պահանջել է ավելացնել Հայաստանին, ԼՂ–ին և Ջավախքին հատկացվող օգնությունը

ԱՄՆ Կոնգրեսի հայկական հարցերով հանձնախմբի համանախագահ Ֆրենկ Փալոնեն կոնգրեսականներին կոչ է արել ավելացնել Հայաստանին, Ջավախքին և Լեռնային Ղարաբաղին ամենամյա տրամադրվող օգնության չափը։ Հայամետ կոնգրեսականը նաև կոչ է արել 2013–ին Հայաստանին հատկացվող օգնության շրջանակներում լրացուցիչ գումար հատկացնել Մերձավոր Արևելքից հայ փախստականների վերաբնակեցման խնդիրները հոգալու համար։ 

«Այդ օգնությունները կարող են ուղղվել հայ–ամերիկյան ռազմական հարաբերությունների և տնտեսական զարգացմանը, ինչպես նաև անվտանգության խնդիրների լուծմանը»,- ասել է նա։

Վերջինս նշել է, որ պետք է առնվազն 5 միլիոն դոլար հատկացնել ԼՂՀ–ին, Վրաստանին ԱՄՆ–ի կողմից տրամադրվող ֆինանսական օգնությունից առնվազն 10%–ը պետք է հատկացվի Ջավախքի շրջանում աշխատատեղերի բացմանը, առնվազն 50 միլիոն դոլար տնտեսական օգնություն պետք է տրամադրվի Հայաստանին։ 

Փալոնեն նաև կարևորել է ԼՂՀ իշխանությունների ԵԱՀԿ Մինսկի խմբում բանակցային կողմ դարձնելը։

Փալոնեն նաև պնդել է նվազեցնել Ադրբեջանին տրամադրվող օգնության չափը և վերացնել խոչընդոտները՝ ԼՂ ներկայացուցիչների հետ շփման և հարաբերությունների հաստատման հարցում։

ԱՄՆ Կոնգրեսի հայկական հարցերով հանձնախմբի ներկայացուցչի հայտարարությունը ողջունել է ԱՄՆ Հայ Դատի գրասենյակի ղեկավար Արամ Համբարյանը։