Հայաստանում գյուղացիական շուկան ենթակա է ցնցումների և շարունակում է դժվար կառավարելի մնալ. Գառնիկ Պետրոսյան

«Հայաստանյան գյուղատնտեսությունում, ինչպես այլ ոլորտներում, ձևավորվում է օլիգարխիկ համակարգ»,- այսօր լրագրողների հետ հանդիպման ժամանակ ասաց կառավարման փորձագետ Հարություն Մեսրոպյանը

և ավելացրեց, որ խոշոր հողերը գնվելուց հետո օգտագործվում կամ չեն օգտագործվում հարուստ տերերի ցանկությամբ: «Եթե նման միտումները պահպանվեն, մոտակա տարիներին գյուղատնտեսության ոլորտում զարգացումներ չարժե ակնկալել: Վերջին ճգնաժամը ցույց տվեց, որ պետությունը պետք է ավելի մեծ միջամտություն ցուցաբերի գյուղատնտեսության ոլորտում, ինչպես դա արվում է աշխարհի մնացած երկրներում» նշեց բանախոսը:

Հանդիպմանը ներկա մյուս բանախոսը՝ գյուղատնտեսության նախարարության նախկին պաշտոնյա Գառնիկ Պետրոսյանը, իր հերթին նկատեց, որ Հայաստանում գյուղացիական շուկան ենթակա է ցնցումների և շարունակում է դժվար կառավարելի մնալ: «Նախ՝ մեզանում երբեք չի կարգավորվում առաջարկի և պահանջարկի հարաբերակցությունը: Շուկայի վրա ազդում են ինչպես արտաքին գործոնները, կլիմայական պայմանները, այնպես էլ, օրինակ, տարադրամի փոխարժեքը: Ես կարևորում եմ պետության կարգավորիչ դերը, որը շուկան պետք է բերի անցնցում վիճակի: Պետությունը պետք է աջակցություն ցուցաբերի գյուղացուն»,- ասաց նա:

Գառնիկ Պետրոսյանը նաև նշեց, որ պետք է զարկ տրվի գյուղմթերքի տարատեսակ տոնավաճառ շուկաների գոյությանը, որոնք ավելի կսերտացնեն վաճառող-գնորդ շփումները: «Ուզում եմ փաստել, որ անասելի վատ վիճակ է տիրում հատկապես պարարտանյութերի շուկայում, դրանք թանկ են և որոշակիորեն ազդում են գյուղմթերքի ինքնարժեքի վրա,-ասաց բանախոսը»: