Իրավապաշտպանները կոչ են անում Ռուսաստանին չաջակցել Բաշար Ասադին

Մոտ երկու հարյուր միջազգային իրավապաշտպան կազմակերպությունների կոալիցիան Ռուսաստանին և Չինաստանին կոչ են անում չաջակցել Սիրիայի նախագահ Բաշար Ասադին և կողմ քվեարկել ՄԱԿ–ի Անվտանգության խորհրդում Սիրիայի հարցով բանաձևի ընդունմանը։ Այս կոչը միջազգային իրավապաշտպան կազմակերպություններն արել են Սիրիայում հակակառավարական ցույցերի մեկ տարին լրանալու առիթով։
Կոալիցիային են միացել Human Rights Watch, Christian Aid, Մարդու իրավունքների միջազգային ֆեդերացիա և Քաղաքացիական մասնակցության համաշխարհային դաշինք իրավապաշտպան կազմակերպությունները։ Նրանց են միացել հանրաճանաչ մշակութային գործիչներ, այդ թվում բրիտանացի գրող և դերասան Սթիվեն Ֆրեյը և կանադացի երգչուհի Նելլի Ֆուրտադոն, հաղորդում է BBC–ն։

Իրավապաշտպանները դիմել են ՄԱԿ-ի Անվտանգության խորհրդ Սիրիայի հարցով բանաձև ընդունելու համար, որը կստիպի Սիրիայի իշխանություններին դադարեցնել բռնությունները և սպանությունները խաղաղ բնակչության նկատմամբ։