ՀՀ ԱԺ նիստերի դահլիճն ամբողջովին վերազինվել է հայ–կորեական համագործակցության արդյունքում

ՀՀ Ազգային ժողովի նախագահ Սամվել Նիկոյանը մարտի 15-ին ընդունեց Հայաստանի Հանրապետությունում Կորեայի Հանրապետության նորանշանակ արտակարգ եւ լիազոր դեսպան Վի Սուն Լակին: Վերջինիս շնորհավորելով նոր պաշտոնը ստանձնելու կապակցությամբ՝ պարոն Նիկոյանն անդրադարձավ հայ-կորեական արդեն ձեւավորված սերտ հարաբերություններին, կարեւորեց երկկողմ կապերի հետագա ընդլայնումն ու զարգացումը: ԱԺ նախագահը հատկապես առանձնացրեց միջխորհրդարանական առկա համագործակցությունն ու դրա խորացման անհրաժեշտությունը: Նրա խոսքով՝ խորհրդարանների միջեւ հարաբերությունները զգալի ներդրում կարող են ունենալ երկու երկրների ու ժողովուրդների փոխճանաչելիության մակարդակի բարձրացման, համագործակցության նոր ոլորտների բացահայտման գործում:

Խորհրդարանի ղեկավարը նշեց, որ հայկական կողմը բարձր է գնահատում Կորեայի Հանրապետության կառավարության կողմից իրականացվող օգնության ծրագրերը: Մասնավորապես, երկկողմ համագործակցության արդյունքում ամբողջովին վերազինվել է ՀՀ Ազգային ժողովի նիստերի դահլիճը եւ այժմ այն համապատասխանում է միջազգային ամենաբարձր չափանիշներին:

Պարոն Նիկոյանը կարեւոր համարեց երկու երկրների միջեւ փոխայցերի ակտիվացումը, փորձի փոխանակումը, համագործակցությունը տարբեր' առեւտրատնտեսական, գիտատեխնիկական, կրթության, մշակույթի եւ այլ ուղղություններով, ինչը հայ-կորեական հարաբերությունները զարգացնելու եւ ամրապնդելու կարեւոր խթան կհանդիսանա:

ՀՀ-ում Կորեայի Հանրապետության արտակարգ եւ լիազոր դեսպանը, շնորհակալություն հայտնելով ընդունելության համար, նշեց, որ իր ջանքերն ուղղելու է երկու երկրների, մասնավորապես' խորհրդարանների միջեւ կապերի ու համագործակցության խորացմանը: