ՀՀ մշակույթի նախարարն ընդունել է ՀՀ-ում Հունաստանի գործերի ժամանակավոր հավատարմատարին

ՀՀ մշակույթի նախարար Հասմիկ Պողոսյանն ընդունել է ՀՀ-ում Հունաստանի գործերի ժամանակավոր հավատարմատար Վասիլիկի Դիկոպուլուին: Հանդիպման ժամանակ նախարարն անդրադարձել է տարվա կարևորագույն նախաձեռնություններին ու երկկողմ անելիքներին: Նա ներկայացրել է ՅՈՒՆԵՍԿՕ-ի կողմից Երևանը 2012 թ. գրքի համաշխարհային մայրաքաղաք հռչակվելու, նաև հայ առաջին տպագիր գրքի 500-ամյա հոբելյանի միջոցառումների ծրագիրը: Աշխարհի տարբեր երկրների մշակութային պատվիրակությունների շարքում հրավիրել է հունական կողմին մասնակցելու ինչպես պաշտոնական բացման հանդիսություններին՝ «ArmBookExpo»-ին, այնպես էլ տարվա ընթացքում Հայաստանում կայանալիք գրքի թեմաներով բազմաբնույթ միջոցառումներին. հայերի և Հայաստանի մասին Հունաստանում տպագրված գրականության ներկայացում, հունական գրականության օրերի անցկացում, Հունաստանի գրողների այցելություն Հայաստան: Նախարարը նաև տեղեկացրել է, որ մայիսի 24-27-ը Հայաստանը հատուկ հյուրի կարգավիճակով մասնակցելու է Սալոնիկի գրքի միջազգային տոնավաճառին:

ՀՀ մշակույթի նախարար Հասմիկ Պողոսյանն ու ՀՀ-ում Հունաստանի գործերի ժամանակավոր հավատարմատար Վասիլիկի Դիկոպուլուն անդրադարձել են նաև երկու երկրների մշակույթի նախարարությունների միջև 2011-2013 թթ. համագործակցության հուշագրի դրույթներով նախատեսված 2012 թ. Հունաստանի Հանրապետությունում Հայաստանի մշակույթի օրերի և 2013 թ. Հայաստանի Հանրապետությունում Հունաստանի մշակույթի օրերի անցկացմանը:

Կողմերը մասնավորապես քննարկել են ս.թ. Հունաստանում կայանալիք հայկական մշակույթի օրերի ձևաչափը (համերգային և ցուցահանդեսային ծրագրեր, կինոյի շաբաթի անցկացում և այլն): Նախանշվել է նաև 2013թ. Մ. Մաշտոցի անվան հին ձեռագրերի ինստիտուտ «Մատենադարան»-ի ձեռագրերի ցուցահանդեսի կազմակերպումը Հունաստանի «Բենակի» թանգարանում: