ՀՀԿ-ի վերջին փակ հարցումներով ԲՀԿ-ն առաջատար է

«ՉԻ» տեղեկություններով` ՀՀԿ վերջին փակ հարցումներով վերստին ՕԵԿ-ը չի հաղթահարել 1 տոկոսի շեմը, իսկ ԲՀԿ-ն դարձյալ ստվերում է թողել ՀՀԿ-ին:

Բանն այն է, որ անցկացված սոցհարցման տվյալներով առաջին տեղում ԲՀԿ-ն է, ընդ որում՝ ցուցանիշների բավականին մեծ առավելությամբ:

Ավելացնենք նաեւ, որ, մեր տեղեկություններով, ԲՀԿ-ի շարքերը տարբեր համայնքներում սկսել են համալրվել ՀՀԿ կարկառուն դեմքերով: Բազմաթիվ թաղային հեղինակություններ, որոնք տարիներ շարունակ աշխատել են ՀՀԿ-ի համար, այս անգամ որոշել են աջակցել Գագիկ Ծառուկյանին. նրանցից ոմանք՝ հրապարակային, ոմանք էլ՝ խիստ գաղտնի պայմաններում: Հայտնի է, որ ՀՀ ոստիկանապետ Վլադիմիր Գասպարյանը ջանք ու եռանդ չի խնայում «հալածելու» Ծառուկյանի համախոհներին ու կողմնակիցներին, եւ դա զարմանալիորեն սպասված արդյունք չի տալիս: Հակառակը, որքան մեծանում են արհեստական ճնշումները, այնքան հասարակության որոշակի խմբերի հոսքը ԲՀԿ մեծանում է: Որոշ քաղտեխնոլոգների դիտարկմամբ՝ սա բնական գործընթաց է, քանի որ այսօր հանրապետությունում այնպիսի քաղաքական իրավիճակ է, որ սոցիալական տարբեր խմբեր ակամայից մղվում են դեպի այն քաղաքական ուժը, որի մեջ իշխանությունը վտանգ է տեսնում:

Ի դեպ՝ շաբաթ օրը ԲՀԿ համագումարն է, եւ պետք է տեսնել, թե օրինակ ԱԺ պատգամավորները ինչպիսի երանությամբ են նայում իրենց այն գործընկերներին, որոնք հրավիրված են մասնակցելու համագումարի աշխատանքներին: Նշենք, որ համագումարը կայանալու է Կարեն Դեմիրճյանի անվան մարզահամերգային համալիրի մեծ դահլիճում. եւ չնայած սրան՝ տեղերի սահմանափակ լինելու պատճառաբանությամբ ԲՀԿ-ն հրավիրատոմսեր է բաժանել միայն ԱԺ խմբակցությունների ղեկավարներին ու նրանց տեղակալներին: