Սպառնալից տեսանյութ ԻԼԻՊ-ից՝ Էրդողանին (տեսանյութ)

Ամեն օր մարդկանց գլխատելու և պատանդ առնված զինվորներին սպանելու տեսանյութեր հրապարակող «Իրաքի և Լևանտի իսլամական պետություն» (ԻԼԻՊ) ահաբեկչական խմբավորումն այս անգամ էլ հրապարակել է Թուրքիայի նախագահ Ռեջեփ Թայիփ Էրդողանին և արևմտյան պետություններին թիրախ դարձրած տեսանյութ:

Ինչպես հաղորդում է «Արմենպրես»-ը' վկայակոչելով թուրքական «Հաբերլեր» լրատվական կայքը, մինչ այժմ հայտնի ահաբեկչական կազմակերպություններից ամենարյունառուշտը' ԻԼԻՊ-ը համացանցում տարածած տեսանյութում, դիմելով Էրդողանին, հայտարարում է. «Քո խալիֆայությունն ավարտվել է»:

2.38 րոպե տևողությամբ տեսանյութում ԻԼԻՊ-ը հայտարարում է, որ Թուրքիան կարևոր դեր է ունեցել Աֆղանստանում մահմեդականների դեմ արևմտյան պետությունների կողմից սկսված գործողություններում:

2014 թվականի հոկտեմբերի 10-ին հրապարակված տեսանյութում ասվում է. «Թուրքիան մահմեդականների դեմ գործող ՆԱՏՕ-ի ուժերի հրամատարն է եղել: Այսօր էլ գործում է ԱՄՆ-ի գլխավորությամբ ստեղծված սատանայական կոալիցիայի հետ»:

Տեսանյութում «Մահմեդական եղբայրների խալիֆ Էրդողանին…» վերտառությամբ ուղերձում ասվում է, որ Թուրքիան իրենց առաջ բացվելու է Ալլահին ուղղված աղոթքներով: Ուղերձում իսլամիստ ահաբեկիչները համոզմունք են հայտնում, որ «իրենց ոչ ոք չի կարող խանգարել գրավել Թուրքիան», քանի որ «Ալլահի ուժը սատանա կոալիցիայից ավելի ուժեղ է»: