Քուրդ աշխարհազորայինները սիրիական Քոբանիում ԻԼԻՊ-ի 86 մարտիկի են ոչնչացրել

Մերձավոր Արևելք 31 Հոկտեմբեր, 2014 18:02

«Իրաքի և Լևանտի իսլամական պետություն» (ԻԼԻՊ) ահաբեկչական խմբավորման դեմ կռվող քուրդ աշխարհազորայինները վերջին 24 ժամվա ընթացքում 86 ջիհադական իսլամիստների են ոչնչացրել սիրիական Քոբանի քաղաքում:

Այս մասին, ինչպես հաղորդում է «Արմենպրես»-ը, հայտնում է Firat լրատվական գործակալությունը:

Ջիհադական իսլամիստները զավթված Ռաքայի, Մանբաջի, Ջարաբլուսի և Թել-Աբյադի իրենց բազաներից օգնական ուժեր են ուղարկել Քոբանի:

Նշվում է, որ Քոբանիում ԻԼԻՊ-ի դեմ պայքարող մոտ 2 հազար քուրդ աշխարհազորայիններից 400-ը ներկայումս կենաց և մահու կռիվներ են մղում դեպի քաղաքապետարան տանող Ազադի փողոցում:

Քուրդ աշխարհազորայիններին օգնելու համար իրաքյան Քրդստանից սիրիական սահմանում գտնվող թուրքական Սուրուչ եկած փեշմերգա ուժերը դեռևս չեն կարողանում իրենց բերած ծանր զենքերն ու սպառազինությունը տեղափոխել Քոբանի, քանի որ ԻԼԻՊ-ի մարտիկները վերահսկում են դեպի քաղաք տանող ճանապարհի վրա գտնվող մի շարք բարձունքներ:

Firat-ը հաղորդել է, որ քրդական ժողովրդական կոմիտեները կոչ են արել նոյեմբերի 1-ին ամբողջ աշխարհում միտինգներ և ցույցեր անցկացնել ի պաշտպանություն Քոբանիի քրդերի:

«Սիրիացի քրդերը' ինչպես Եվրոպայի ժողովուրդները, որոնք դիմակայել են հիտլերիզմին Երկրորդ համաշխարհային պատերազմում, այսօր պայքարում են իրենց ազատ և արժանապատիվ կյանքի համար' հետ մղելով իսլամիստ ծայրահեղական հրոսակների գրոհները», -ասվում է կոչում: Քրդական ժողովրդական կոմիտեները կոչում դատապարտել են քրդերի նկատմամբ Անկարայի պաշտոնական շրջանակների թշնամական քաղաքականությունը:

ԻԼԻՊ-ը, որը ներկայումս իրեն անվանում է «Իսլամական պետություն», Իրաքում ստեղծվել է 2003 թվականին: 2004-2006 թվականներին այդ ահաբեկչական կազմակերպությունը գլխավորել է Աբու Մուսաբ ալ Զարգավին: Նրա կազմում եղել են 11 արմատական իսլամական խմբավորումներ, որոնք սերտ կապեր են ունեցել «Ալ Քաիդա» ահաբեկչական կազմակերպության հետ:

2013 թվականին Սիրիայում զինված ընդդիմության և կառավարական ուժերի միջև դիմակայություն սկսվելուց հետո «Իսլամական պետությունը» թափանցել է երկրի տարածք: Դրանից հետո կազմակերպությունը հայտարարել է այն մասին, որ հրաժարվում է հավատարմության երդում տալ «Ալ Քաիդային» և ջիհադ է հայտարարել բոլոր խմբավորումներին, ինչպես նաև կառավարական ուժերին:

Սիրիայում «Իսլամական պետության» ուժեղանալը հանգեցրել է նրան, որ այն կարողացավ վերադառնալ Իրաք' ռազմական գործողություններ սկսելով այդ երկրի կառավարական ուժերի դեմ:

Այս տարվա հունիսի վերջին «Իսլամական պետությունը» հայտարարել է Իրաքում և Սիրիայում իր վերահսկողության տակ վերցրած տարածքներում Իսլամական խալիֆայություն ստեղծելու մասին:

Իրաքի իշխանությունները դիմել են միջազգային հանրությանը' օգնել իրենց պայքարելու այդ ահաբեկչական կազմակերպության դեմ: