Պարգևներ` հրշեջ-փրկարարներին, ամենագնաց ավտոմեքենա` Արագածոտնի մարզին

Մարտի 16-ին Արագածոտնի մարզպետարանում տեղի ունեցավ մարտի 7-ին Արագածոտնի մարզում վատառողջ մարդուն օգնության հասած և նրան ձյան միջով շուրջ 4 կիլոմետր պատգարակով մինչև շտապօգնության մեքենա հասցրած հրշեջ-փրկարարների պարգևատրման արարողությունը։

Ֆիզիկական և մասնագիտական լավ պատրաստվածության համար հրշեջ-փրկարարներ՝ փ/ծ մայոր Ատոմ Հակոբյանը, փ/ծ ենթասպաներ Արթուր Մովսիսյանը և Ահարոն Հարությունյանը, փ/ծ ավ. սերժանտներ Գոռ Գրիգորյանը, Գառնիկ Պողոսյանը և Մուշեղ Գևորգյանը, փ/ծ սերժանտ Վարդգես Սարգսյանը և փ/ծ կրտսեր սերժանտ Գարիկ Կարապետյանն ԱԻ նախարար Արմեն Երիցյանի հրամանովպարգևատրվեցին 50 000-ական դրամով, իսկ խմբի հրամանատար, փ/ծ մայոր Հայկ Արշակյանը՝ «Կանխարգելում, օգնություն, փրկություն» մեդալով:

Հրշեջ-փրկարարներին պատվոգրեր և դրամական պարգևներ հանձնեց նաև Արագածոտնի մարզպետ Սարգիս Սահակյանը։ «Շատ եմ կարևորում նման միջոցառումների կազմակերպումը, քանի որ, կարծում եմ, հասարակությունը, մենք բոլորս պետք է գնահատենք հրշեջ-փրկարարների անձնվեր աշխատանքը։ Մեր մարզում աշխատում են այնպիսի փրկարարներ, որոնք շատ լավ պատկերացնում են իրենց աշխատանքը, նվիրված են իրենց մարզին և երկրին», - ասաց Արագածոտնի մարզպետը, ապա ավելացրեց՝ «անցյալ տարի ԱԻՆ աշխատակիցները, վտանգելով իրենց կյանքն ու առողջությունը, ծավալուն աշխատանքներ իրականացրեցին անտառային հրդեհների վերացման ուղղությամբ, ձմռան ամիսներին պատվով կատարեցին իրենց գործը՝ ձյան գերությունից ազատելով բազմաթիվ մարդկանց և խցանումներից դուրս բերելով տասնյակ ավտոմեքենաներ։ Ես շատ բարձր եմ գնահատում մարզի բնակչության կողքին մշտապես կանգնած հրշեջ-փրկարարների աշխատանքը և ցանկանում եմ ևս մեկ անգամ նշել, որ մարզային իշխանությունները ցանկացած պարագայում պատրաստ են աջակցել նրանց»։

Նախարար Երիցյանը, շնորհակալություն հայտնելով մարզպետին բարձր գնահատականի համար, նշեց. «Այսօր ԱԻՆ փրկարար ծառայությունը կատարում է իր առջև դրված խնդիրները, սակայն, այնուամենայնիվ, անելիքներ դեռ շատ ունենք։ Այս տարվա մեր գերակա խնդիրներից է լինելու գյուղերում, հեռավոր համայնքներում կամավորական հրշեջ-փրկարարական ջոկատների ստեղծումը, որը կնպաստի արտակարգ իրավիճակների արդյունավետ և օպերատիվ արձագանքմանը։ Պետք է նշել, որ Արագածոտնի մարզում Արտակարգ իրավիճակների նախարարությունը կարողանում է կատարել իր առջև դրված խնդիրները։ Փետրվարի վերջին մարզի մի խումբ փրկարարների պարգևատրելիս նշեցի, որ արդեն այս տարի մենք կունենանք ամենագնաց մեքենաներ և ձնագնացներ, որոնցով ավելի արագ և հեշտ կլինի առատ ձյան և ձնաբքի պայմաններում մարդկանց օգնություն ցուցաբերել։ Այսօր Արագածոտնի մարզային փրկարարական վարչությանն ենք հանձնում «ՈւՐԱԼ» մակնիշի ամենագնաց նոր ավտոմեքենա»։

«ՈւՐԱԼ-43203» մակնիշի ամենագնաց ավտոմեքենան կահավորվել և հարմարեցվել է որոնողափրկարարական աշխատանքների իրականացման, ձմեռային պայմաններում ձնաբքում հայտնված մարդկանց փրկելու և տեխնիկան խցանումներից դուրս բերելու, ինչպես նաև արտակարգ իրավիճակի վայրում որպես ղեկավարման շտաբ օգտագործելու համար։

Ավտոմեքենան կահավորված է 15 մարդու համար նստատեղերով, սրահի ջեռուցման առանձին համակարգով, թեյի և սուրճի պատրաստման համար էլեկտրական սարքավորումով, ջրի տարողությամբ, փրկարարական պարանով, ավտոմեքենաները քարշակելու համար մետաղյա ճոպանով, լապտերներով, չոր սննդամթերքով, առաջին անհրաժեշտության դեղորայքով և տաք ծածկոցներով։