Էդվարդ Նալբանդյան. «Ադրբեջանն ինքն իրեն դրել է փակուղու մեջ»

«Միավորված ազգերի կազմակերպության Անվտանգության խորհրդում Ադրբեջանի ոչ մշտական անդամ դառնալու կապակցությամբ վերջերս բավական զգացմունքային մեկնաբանություններ հնչեցին' միգուցե ադրբեջանական քարոզչությունից տպավորված, թե Ադրբեջանը ինչերի հասավ, ինչեր է անելու, թե տեղափոխելու է ԼՂ հարցը Անվտանգության խորհուրդ եւ այլն, եւ այլն»,– Ազգային ժողովի մշտական հանձնաժողովների նոյեմբերի 3-ի համատեղ նիստում այս մասին ասաց ՀՀ արտգործնախարար Էդվարդ Նալբանդյանը' հավելելով. «Իրականում չեմ կարծում, որ այդ անդամակցությունը արժանի է մեծ արձագանքի»:

Ղարաբաղի խնդիրը Անվտանգության խորհուրդ տեղափոխելու սպառնալիքի կապակցությամբ նախարարն ընդգծեց, որ Մինսկի խմբի եռանախագահող երկրները՝ ԱԽ-ի մշտական անդամներ Ռուսաստանը, ԱՄՆ-ն, Ֆրանսիան, բազմիցս հայտարարել են, որ ղարաբաղյան հիմնախնդիրը պետք է լուծվի ԵԱՀԿ Մինսկի խմբի շրջանակներում, այլ ոչ թե տեղափոխվի այլ հարթակներ: «Կարծեմ' հստակ պատասխան է տրված, եւ այստեղ Ադրբեջանից հնչող հայտարարությունների պատճառով ինչ-որ էմոցիաների մեջ ընկնելու կարիք չկա»,-ասաց Է.Նալբանդյանը:

Նա նշեց նաեւ, որ չի կիսում Բաքվից հնչող եւ դրանից տպավորված որոշ վերլուծաբանների այն կարծիքը, թե Ադրբեջանի ընտրությունը վկայում է այն մասին, որ միջազգային հանրությունը ԼՂ հիմնախնդրի կարգավորման հարցում աջակցում է Ադրբեջանի դիրքորոշմանը եւ ստեղծում առավել նպաստավոր պայմաններ այդ երկրի համար: «Ադրբեջանն ինքն իրեն դրել է փակուղու մեջ: Միջազգային հանրությունն արդեն արտահայտել է իր դիրքորոշումը, որը համահունչ է Հայաստանի դիրքորոշմանը, եւ չէի ասի, որ համահունչ է Ադրբեջանի մոտեցումներին, հակառակ դեպքում այն չէր մերժվի»,-ասաց նախարարը:

Ըստ նրա, այն հայտարարությունները, որոնք արվել են եռանախագահող երկրների կողմից եւ արտահայտում են միջազգային հանրության կարծիքը, հրապարակայնորեն հնչել են ամենաբարձր մակարդակով լ՛Աքվիլայում, Մուսկոկայում, Դովիլում: Համապատասխան հայտարարություններ են արվել ԵԱՀԿ շրջանակներում՝ Հելսինկիում,Աթենքում, Ալմաթայում, Աստանայում: Այդ դիրքորոշումը արտահայտվել է նաեւ Կազանի հանդիպման ժամանակ՝ կողմերին ներկայացված փաստաթղթի միջոցով, որը մերժվել է Ադրբեջանի կողմից:

«Սա է միջազգային հանրության մոտեցումը ղարաբաղյան հարցում, եւ Հայաստանը ասել է, եւ այսօր էլ կրկին վերահաստատում եմ, որ դրանք համահունչ են մեր դիրքորոշմանը: Դրանց հիման վրա մենք պատրաստ ենք շարունակել բանակցությունները եւ գնալ կարգավորման: Միգուցե Ադրբեջանը, դառնալով ԱԽ ոչ մշտական անդամ, ավելի լուրջ եւ կառուցողական մոտեցում կցուցաբերի: Տեսնենք: Խիստ կասկածելի է»,-հայտարարեց Հայաստանի արտգործնախարարը:

Նշվեց նաեւ, որ, ըստ ՄԱԿ-ի կանոնադրության 23-րդ հոդվածի, Անվտանգության խորհրդի անդամը պետք է ներդրում ունենա միջազգային անվտանգության պահպանման հարցում: Է.Նալբանդյանի համոզմամբ, խիստ կասկածելի է նաեւ, թե արդյոք Ադրբեջանն «ի զորու կլինի հետ կանգնել իր ռազմատենչ քաղաքականությունից, պատերազմ հրահրող կոչերից, ռասայական խտրկանություն եւ թշնամանք սերմանող հայտարարություններից»:

Է. Նալբանդյանն ընդգծեց, որ Հայաստանը շարունակելու է իր հետեւողական, հավասարակշիռ քաղաքականությունը: «Առանց ներվային կոնվուլսիաների մենք շարունակելու ենք քայլեր ձեռնարկել թե ղարաբաղյան հիմնախնդրի կարգավորման ուղղությամբ, թե ընդհանրապես մեր տարածաշրջանում կայունության եւ անվտանգության ամրապնդման իմաստով»,-հայտնեց նա: